KIPAKNA HINKHUA
-Rev.Thanglianmang
1.TAKSA DAMTHEINA : Atangpi in taksa ah mi damthei te chun ahinkhuau in kipakna chu mi damtheilo te sang in ahau jawu ahi. Mi hisello te chu anatna jiak ua chun kiningtel in phunnoina dim in kipakna hinkhua anei tam puau. Ziajiakchun, kipakna hinkhua neina dingin taksa damtheina apoimaw ahi.
2.CHANTAWK AH LUNGAWI : Mi anei leh lam leh achan chunga lungawi tak ah khawsa thei te hinkhua chu kipaknan adim sek ui. Tup phaklo tiang tiang buaipi ah mi hausa te eng ah, a insung dinmun tawh kituak ah khawsak gawlo taphot te hinkhua chu abuai sek ban ah kipakna hinkhua anei thei puau.
3. THIL ZOSIA APHALAM AH NGAI : Midang te thugen adik hin dik talo lehle aphalam ah ngaithei mi leh hinkhua vangsiatna tuak maleh amalam hinkhua thilna kipaknan don dinga thil jing thei te hinkhua chu kipaknan adim jing ui.
4. THILPHA BAWL : Mi a laak leh nekdaw sanga midang panpina lungthim nei te, bangkim ah thutak ah nekguk bawllo, mi kingaitawm, mijosia tawh kicham ah melma neilo, mi sum ditjo lo ding bat neilo, ju leh sa kibuallo leh insung kitup tak ah khawsa te hinkhua chu kipaknan adim ui. Thilpha bawl te hinkhua chu lungmuan na dim in lauthon na aum puai.
5. PATHIAN TAWH KIPAWL ZING : Pathian doigual ah khawsa ah hunsin ah pauchap, bible sim, apakna la sa jing, malsawmna adon dungjui ah pathian pethuk kik, malsawmna adon te chu aphulo ah ngaite hinkhua chu kipaknan adim sek ui.
6. DEE LUI PAM AH BUHEKTU (The miller of the Dee) SAPTE TUANTHU APAT : Dee lui pam in buhektu mi pakhat hi acheng hi. Zingkal apat zan tiang in gimtak in na asem sek ah, anasep pumin kipak takin jia laa hi asa sek hi – Kuama ka eng puan, Kuaman kei le ei eng diak puai ti laa ahi. Nikhat chu England Lengpa HAL chu ahung in akiang in, Kei la Leng ka hi vang in kipakna hinkhua ka nei thei pua, nang la gimtak ah nasem la hi vang in la kipak ah, l hina hi kisang thei le ka nuam jiang hi. La kipak thei na thuguk chu ei gen in ati ahi. Buhektu pa chu nui kawm in alukhuk latha in adonhu ah – Nisin ka nekding ka sem dawk ah, Ka ji ka hepi ah, ka loite ka hepi ah, Ka cha pathum te ka hepi kit ah, Ka dit jawlo di mi sum ka ba puan, Ka Inkuan chopna ding ah ka khol hekdawna Dee luipi kiang in kipakthu ka gen hi ati ahi. Lengpa chun, Loipa, kakipak hi, mangpha mat in la, kipak takin umjel tan Aw. Ahinla, Kuaman ei eng puai ti laa kha sakit ta kin, Kei man nang hun eng ma ma ka hi. La lukhuk buvai ah dim kha Ka lallukhuk sang in athupi jawn, La buhekna Khol kha Ka lalgam sang in athupi jawi, Nangma gual hi ahi Ka gam in a mamaw chu ti in a nusia ta ahi.
7. KIPAKNA HINKHUA NEITE MANTAM DAN : Mi kipak te kianga um leh ki holimpi chu mijosian nuam akisa chiat hi. Mi kipak na ding gendok thei te chu mipil ahi ban ah lunggim laitak adin amau haw chu damdoi hoitak ahiu. Neinung tak ah i van neite chung ah buaitak ah lunggel gim tak ah hinkhaw mat sangin nekkawm hawl ah kipak tak ah um chu a phajawi. Tulai hin mi hausa te sang in mi genthei te hinkhua hi kipaknan adim jaw tau ahi. Ziajiakchun, khawvel ah mi kipak thei te hi mi nuam sa pen, mi en um pen leh mi hausa pen te ahiu.
