KHAWVÊL ZÊM HAWI TÛ HI DING IN :
-KL Muana Vaiphei
Aw chung solthapi lavâk hawi na le la zemhawi na khawvel kiltin,sulang in la, chuti chun khawvel mun tin hung sal êng intin, a sunga cheng te le hing te lim le kipâk in laitual leng ding a hi ta mai ui. Lavâk na le la lûlna siamtun a piak a hi di dan tak ah, la mat chun khawvel hi malai Eden hun chang kit in na, a sung a hing leh khawsa zojâi chu lim in lâitual leng di a hi ta mai hi.
Aw nang Chin’ leh Tûai la vanglai hi pâkcha pak lûn lai tak gual la hi zia, hunbi chu chawl lo le tawpni um lo dîn la kal-chawi le la maisua in, mimal leh Khawvel in, a hi di gual tak a êng dawk ding law khu mai lo in, tangchung a meisel um gual in hung su-vak zing in, zia chun khawvel leh a sung a Cheng le khawsa zosia kipak in, a siamtu ngei le lung awî in, khawvel cheimawi leh zem mawitu hung hîn na, Siamtu guangalna le lopina chu hung ki lang mai di a hi.
Zia khawvel thupi na sulang ding a siam le guat i hinau a hin, lamsuk lamtou palthen di tam pi a um mai thei a hi, Zia zojai chu zoding ah, a ma kibatpi ah siam i hiu a hi.Athagau thiangtho le eima a kawisa thagau hinna hi, kizawp mat sek leu hin, lawtinna kalbi hung hi ngal di a hi.
Siamtu Pathian le a thil tup te sem dawk dinga mihiam a ma ki bat pi siam leh kumtuang tun ngei na ding ah, thil hitheina le maw puakna ei piak te hi, subukim ding ah ngansia i hiu, zia chu supiting ding in Pathian thagau ei mau a um chu bia a, petu Pâ Pathian thagau thiang tho in khawvel dogal hi zo ngei ding in theitawp sua leu hin zawna chu chang ngei ding i hiu.
Thiampu dang te gual a khawvel buai na taisan ah, gamthip ah, Pathian tawh kiho mai bep hin gual zawna bukim ei pe thei puai, a hinla Eden natna a pat hak satna le buai na nuaisia in, gualzaw na tatna Ziak ah, i chan chun, taksa leh thagau kumtuang chawlmun chu ei tut ngei di a hi.
