V. Munlai khua kum 25 tinna lawm

V. Munlai khua kum 25 tinna lawm

25 Jan 2021: CCpur, Jan. 15 (Thuhiltu) : Henglep Sub-Division huapsung ah um, kum 1996 ah a la kisat, V. Munlai khua’n tuni’n zingkallam dak 11:30 in “Aw Lalpa kahun chawihoi ui” ti thupi mang in V. Munlai khua kum 25 tinna Silver Jubilee a lawm hi. Zia hun chu Upa Liazakap/ T.K Siama in a mapui a, Upa Thangkap in hunhawn pauchapna nei in, Khuptinlam, Chief of V. Munlai apat Jubilee report leh khua chanchin genlatna a um a, Rev. N. Khanpau (rted) in Jubilee suangphu hondawna leh a latna a nei hi. Special Invitee hina toh Kimthang Chief of Lungchuang, Manglianpau Chief of Mualdak te’n hun matna a uap ua, Upa T Manga Vaiphei, Ex-Minister Govt. of Manipur in Jubilee souvenir hondawna a nei hi.

Hun mat sung in, mipi’n Bible chang genkhawmna nei in, Khatkhotong Baite, President, VPC GHQ, lalzakhai, Social Worker, Genneikhup Vaiphei, Dy. Chairman, ADCC, Manipur, Hengjang Vaiphei, Commandant, CRPF te apat in thugenna a um a, invited artistes – Nausi Vaiphei, Tracy Ngaiching, Kenedy Vaiphei te apat in laasakna a um hi.