🧘♂️NAUPANGTE MAMAW🧘♀️
Bible changtel : Thupilte 22:6
Aziktu: Pu Ginlalthuam –MPCS te Sunday School Zillai apat laksawn ahi.
Lalgin inn
Mualngat innpi
Khualzinna gam.
🌾
Naupang i tiphat takleh a piantil ua pat kum 12 tiang hih NAUPANG itisek ahi.
Zia hung sung ah a ma mawpen tak uh chuh:
1) Zilsakna pha
2) Naupang ngaisakna
3) Biakinn/Sunday skull kai(Pathian angainat thei na ding un)
4) Mihingte pha tak ah hinkhawmna dinga zilsak:
a)ginumna
b)diktatna
c)taimatna
d) sang ah upazaw zading leh midangte hepi danding tihaw zilsak hih, zia hunsung ahin amau mamaw lian pen chuh ahi.
Ahin, naupangte mamaw hih nu leh pa, piting taten i bawllo theilo uh(indispensable task) na lopi tak mai khat chuh——– naupangte hih Pathian thu leh laa, ziltilna lam ah etkawl/kaihuai chuleh ziltil ding hih nu leh pate mawpuak, naupangte mamaw lian pen khat chuh ahi.
Zia ding achun Pathian in nu leh pa ei piak him ahi. Zia bep chuleh hilo; zia naupang etkawl hih Pathian lung lam(God’s will) ahi him ahi.
Pathian thupiak gual ngei in naupang chuh kaihuai thei hileh buaina tamtak lâk apat kikiang thei dingin ngaidan um thei in’a. Pathian thu ah hawitak cha i kaihuai thei sek lo ziak un naupang tamtak, a hung piting hun un siatna leh buaina ten innsung, khawsung/vengsung, kochuamsung leh namsung in lungngaina leh beidawnna te ituak sek uh ahi.
Pathian nasemtu lopi, DL Moody chun,”Ka nu’n ei etkawl gual ahin mi nuten acha teu enkawl chiat taleu suangkul (Jail) siam ngai puan’a,” ala ti hial ahi.
Naupang i ti hih anu leh apa khut liau liau ah kinga, Pathian ei piak gil-a-ga malsawmna chuh ahiu in, Lalpa Pathian dawi dan gual ngei ah pha taka i etkawl ah i ziltil ahi chun Lalpa Pathian in a hun tak ah lawman/gâ(fruit/reward) ei hun pemai ahi.
Zia ziak achun, naupang chuh a chiana ding lampi ziltil lechin a upat tiang in hemil ta puan’a. (Thupilte 22:6)
Ziachuh ahi NAUPANG te mamaw lianpen khat chuh…..!
👫🏃♀️🏃♂️👬
