“KINEPNA”
Bible changtel: 1 Korinth 15:19.
“MIHINGTE HIH KINEPNA HING NEITE IHIU”
Aziktu: Pu Ginlalthuam
Lalgin Inn
Mualngat Innpi
Khualzinna Gam
( Land of Pilgrimage)
🙏
Simtute laleng un damna chibai🤝
Khawvel i khualzinnau gam ahin mihiamte hih i hung pian apat KINEPNA tawh piangkhawm in, chutichun nasep thilbawl hihenla, thiamna chitna kawngbang kim ah sem leh bawl ah, zil i hiu hi.
Kinepna neilo chuh athi gual mai ahi.
I chungah thil tung, asia hin apha hitaleh zia ah chun kinêm in i hing uh ahi.
Tulai hiipi huaisia(Covid-19 pandemic) hiileng, veiziak ah athi amang pungdeu deu tamaleh hunkhat chuh ahung kithial/ bei hun hung umna loding ahem…! Zia chuh, mihingte kinepna lian tak khat ahi zing hi.
Tulai takin ei Manipur state ading ah damtheina lam tawh kisai MEDICAL INFRASTRUCTURE pha leh hawi, Phaipi( Imphal) mun; RIMS tawh JNIMS Hospital ah OXYGEN plant a hung kisiam dawk ta; zia bep chule hilo in ei Churachandpur District ahle OXYGEN plant siamna ding bawl khawklai tak ahi ban in Churachandpur Medical College, damthei nalam tawh kisai in zilna mun ding sorkal (Government) in ei guanggal piak hih mipite kinepna lian tak khat ahung hih tah ahi.
Chun Dr. Komal Singh in …”Ashana leiringeida mioiba shiba naide”. Zia chuh ” Mihing in kinepna i hinpi ahi”, tiin ala gen hi.
Khawvel ah mihingte i damlai ni hin kinepna neilo a kium ngai puai. Hun leh phat ahung kihei tawh dungzui in kinepna thawn ahiloleh kinepna guitung/ziksuak tiin i hinkhua a chialiam zel hi.
A bangchuh hitaleh, Pathian ei siamtu hepina achun kingân; kinem inla, damtak in um inla, Pathian malzawlna dawngtak hithei dingin la nisin hinkhua, kinepna thawnlo hial dingin kiging zing in um inla, damlo te’n dam kik ding kinem in, nasem thilbawlte chuleh zilna neite’n lawtinna leh gualchung chuan ding kinem in, Khristian chate’n haksat genthei thuak zing kawm in vangam tunding kinem in, taksa leh thagau lam in kinepna lian tak nei zing kawm in i kithamuan tua sek ding uh ahi.
Nikhat nile KINEPNA ziakin i do gaal uh zo nalo ding ihiu em….! (with hope we shall overcome someday).
Awle, atawpna dingin tuni i gennawp pen ahileh mihiamte hih khawvel damsung ading bep ah KINEPNA nei ihipuau ah thagau gam tiang huap ah KINEPNA hing nei te ihiu ahi.
Ahin, Khrist ah i kinepnau chuh tu damsung ding bep ahi khãk le vang chuh mi zosia lak ah lungsiat um pen hih ding ihiu.
Khawvel damsung chawmcha ahin taksa chuleh thagau ah KINEPNA hing nei ah ziksuak thei chiat dingin simtute zosia i Lalpa Jesu min in kadawisak na ka hung lan ahi.
✝️
