ZINGKALPHA GOODMORNING ALL🤝 THU TAK KI NGAK THEINA BUKIM ‭JOHAN 17:17

ZINGKALPHA GOODMORNING ALL🤝

THU TAK KI NGAK THEINA BUKIM

‭JOHAN 17:17
Thutak in amau hi’thiang in, la thu chu thutak ahi ngal a

Khawvel ahin Pathian thu ti hi a lâl ma ma lo ahi. Jesu min leh a zilsakna te haw hi khawvel mite ngai nawp ma ma ahi puai. Aziak chu Thutak, Thagau thil ahi ziak in. Thu zuau khawvel in ei piak te haw hi tawh ki tuaklo le kikal ahi ziakin! Christian te Pathian, Bible a Pathian tilo hi pathian min tam tak a um ngei nai hinla amau haw chu a lêm ngen ahiu hi. Pathian lem, siamkhawm pathian tam tak a um kit hi. Zia khel achun Pathian um gingchalo mawng mawng(atheists) mi tampi tak khawevl ahin a um kit ui. Science hin khantona phatak ei tunin, Pathian leh athu kiti hetchian lote a kisuk buai buai sangin Science ma hi gingchak mai ding ahi tipawl le mi tamtak a um kit ui. Khawvel thiamna, pilna leh khantona te’n vang bangkim siamtu Pathian chawisang sangin Pathian lim saklo leh Pathian dona a tun zaw sek hi. Pathian siamsa khawvel pilna leh Science(science gincha) in Pathian a do chu leibel in a bawlpa kiang ah nang ka ma mawpuai tina gual tuk a hi. Pathian thil siamsa te apat thilpha-thilhoi mudaw a, mite ading ah a phalam a mat ding siam chu science mawpuakna ahi. Thilpha ei tun te ziakin kipak ding ahi. Hinla Siamtu Pathian dona ahi chun pilvang ngai ahi.

I Christian hinkhua a, i ginnau hi le adik eina diam aw ti’n mimal i buai hun le um theisek ding ahi. Jesu Khrista i ginnau leh Bible a kigente gingchak zawlona (doubt) hun bang a um sek em?

Ginna kalsuan te ading in muthei khawvel thilte’n ei suk nawngkai hun vang um zing ding ahi.

(2 Corinthians 5:7) For we live by faith, not by sight.
(Hebrews 11:6) And without faith it is impossible to please God, because anyone who comes to him must believe that he exists and that he rewards those who earnestly seek him.

Pathian Thu Bible a kizik te zosia hi Pathian hing lei leh van leh asung a um zosia siamtu Van Pathian akipat ahi. Pathian hatkhum a bukim dem kailo ahi.[2Timo 3:15-17]

Pathian Thu Bible hi setan in suk mangthai guan panla zing maleh le lawsam zing ahitan, lawsam tozel ding ahi! Setan matchak ten kum sang bangzat Pathian leh Athu, Bible hi do zing leu le i Pathian Thutak vang mangthai tapuan tin, apak lun zing zaw ding ahi. Khawvel in Christian te leh Christian te ginna hi bang gual tuk in suk chimit gua maleu lawsam zing ding ahiu hi.Khawvel pumpi lekha bu zosia lakah ki zuak tampen, ki sim tampen leh minthang pen chu BIBLE, Christian te Pathian lekhabu THIANGTHO hi ahi. Christian lahi vangpha laki sa em? Bible la nei kipak um lasa em? Christian khat Bible nei, Bible sim leh Bible gente zui i hi nau em? Bible khut a chawi ut leh nei ut ma ma, hinla dodalna thupi tak ziak a nei theilo leh sim theilo Christian dik tak khawvel ahin a tam ma ma ui ti geldawk zing hitiu aw. Zalen tak a Bible nei thei, sim thei, kikhawm thei leh Pathian thu awi thei i hiu uh hi avang phat umzia la geldawk kha sek em unau?

Amin a sakhuana Christian kiti, Bible nei ngal a simlo, Bible sim ngal ah Pathian Thugente zuilona hi Pathian ading in kidak umtak ahi.(abomination to the Lord)

I gam i chennau ahin group/ pawl chuam chuam,pauchap pawl,upa pawl leh ministries kiti bawldan thiam i tam tau hi. BIBLE zilsakna Pathian Thutak buaipi peilo, Pathian leh Athu tak a lungngai sangin mani hamphatna ding a Christianna leh pawl mang phachuam gua zing Christian lem i tam talua tau hi. I bawn chau in ki ngaitua phai tiu! Pathian, Bible a Pathian hin ei muchian ahi aw. Kawl leh vaite pathian khatto bia i hi samlo nak uh le maw….?!
Ei mau siamkhom leh ei mau phasak dan dan a kai vel vel thei Pathian ho leh bia i hiu em? Ei mau thu awi ding chu pathian lem ahin Pathian thutak awi(zui) dingte chu Christian dik tak te a hiu hi.
Lalpa Jesu Khrista athi ding kuan, cross a khetden ahi madeu zan achun zigual hin a Pauchap hi, “La Thutak in amau hi hithiang in, la Thu chu Thutak ahi ngal in” “Sanctify them in the truth; your word is truth”

Lalpa Jesu’n PATHIAN THU chu thutak ahi ati chun thutak himailo ding maw?

Thutak chuam,thagau thagau kilakna chi chuam ahiloleh Pathian kilakna chuam hawl a chom vel vel ding te chu Christian dik tak te hiding hilo a hi. Jesu i gingcha nau em? Do you beleive Jesus? Jesu i ging ua chun A thugente i gingchak ding uh himailo maw? Pathian ging te mawpuakna masapen leh thupipen chu A thu zuina(obedience)ahi!
Pathian thu tak ziltheina chu khawitak a um em i tichun BIBLE a bukim takin a um tai! Hallelujah Amen!
Christian lahi chun Bible a um ahi la nisin ann ding chu! Pathian panpina Pauchap zing komin dawn zing hitiu. Athu hetna, athu neina leh athu a hin theina chu A neitu Pathian kiangin dawn dawn dawn zing hitiu.
Nisin hunsin Pathian thutak a hingin i khawsa zing ding uh ahi. Christian te chu Pathian in umpi zing ding a hi. Thutak in enkawl-ziltil zing’in tin, zia khawvel a umzing hinla Pathian a hita, a neipa thutak in damlai hun chawm cha hi vangam zawtna in lawk takin mangto zing thei tading i hiu hi.

Jesu Khrista hepina leh phatna la tep khata em? Hukdam diktak Pathian apat Piangthak lahi na em?

Pathian hetpi, Pathian nei kiti te chu Christian ahiu in, amau chun Pathian hepina leh phat nate chu hechian leh muchian in, nisin-hunsin in Pathian dawigual, Pathan thu awina’n a hinkhua’u amang tozel sek ui. Mite genphat leh pachakna buaipi talo in, a gin uh Pathian pawmtak hinkhua, Pathian lunglam thîl zing in zia khawvel a khual zinnau hun sawtlo cha hi awl cha cha’n kal asuan zing zaw tau hi….
Pathian gam thiangtho zuan a khualzin i hiu em? Khawvel nawpna, khawvel pakzu chawp a hun mang mualliam zing i hi zawu’ em?

Psalm 119:105 “Your word is a lamp for my feet, a light on my path

‭SAM 119:105
[105] La thu hi ka kengte â dingin thaumei ahi’n; ka lampi â dingin vâk ahi

Please Read Psalm 12
Sam 12 na sim be hitiu aw….

Jesu Suak pha le ginum, Pathian thutak a um hi dingin Lalpa‘n a thu ei malzawl piak hen aw

-GL Muana Neitham