TUI DU A DANGCHÂK TE JESU’N A KO ZING HI
JOHAN 7:37b
.Jesu chu ding in, a kiko ta’n: Kuale Dangchâk tapo te chu ka kiang a hung henla hung dawn hen atii’.
Zia hun lai ah chun JERUSALEM khawpi temple huang sung ah Israel ten’ BÛK KUT ( festival of booths/tabernacle/Sukkot ) amat laitak uh ahi. Búk chu chawm cha chawl dua (chawlngak) na ding a ki siam kawm ahi. Pathian in Aigupta apat a pui daw Israel mipite chau le gim ta ma ma haw’ chu gam keu lak ah chawm cha, ni sagi sung a chawl ngákna ding ua Búk a bawlsak uh het zing na kut amat sek uh a hi. Israel te ading a kut poimaw ma ma mai limna kut ahi. Ki ngainiam taka um a, Pathian a ki ngak zingna kút ahi.(Dependence on God with humility)
(Deuteronomy 16:13-15)
Jerusalem a biakna munpi huam sung a chun (temple courts) Judate sakhua puitu te leh mun chuam chuam apat hung khawm Israel mipite chun BÛK KUT hun chu Pathian biakna (worship) le limna gual nawp (festival/celebration) mang in a buai ma mau’ hi. Kut tawp ni achun Thiampu te chun Siloam dil apat chun tui thál in Temple mun a kithawina chun a sungtha sek ui. Zia ‘tui sung thák’ chun Pathian apat malzawlna ala dawn sau chung ua kipak thugenna leh maban a malzwlna bukim pia ding ah a pauchap na’u (prayer) et sakna a hi. Malzawlna bukim Leng leh Hukdampa JESU Khrista amau lakah ua um zing ahilam Israelte chun a hedawk zo pua’u hi.
Zia BÛK KUT bei ding kuan lam,ani sagi ni chun JESU chu aw ging ngai takin ahung ki ko dawk ta a hi. Thil poimaw tak leh kin khawk ma ma (urgency) chuleh a hun kikhél thei ding, ngaisaklo a um khak ding lau thawng takin a hung gen ta mai hi. Zia JESU’N ah gen chuh: Kua le dangchâk tapo te chu ka kiang a hung henla hung dawn hen atii
Zia a chung ah JESU thu gente haw hi chawm cha’n vak sut khawm in zil khawm hitiu.
‘KUA LE DANGCHÂK’ TOPO TE KA KIANG A HUNG UN (If anyone is Thirsty let them come to me).
Zia Jesu thugen thumal hin mi zosia agenna a hi. Israel te bep genna hi talo in nang leh kei le Lalpa Jesu’n ei chialna(Invitation) a hi.
Taksa thîl tak a dangchak ziang bep genna hilo in Thagau lam lunggil tawp khok a dangchákna, kisap leh bang hem vat leh mamaw tun tun neite genna ahi.( Deep spiritual longing/needs)
Dangchák le tuihal takin i um em? Thagau lam dangchâkna le nei talo a, khawvel taksa thil bep a buai zawu’ gam i hi tau em le? Jesu’n khen chuam neilo in ei chial vek ahi. Thagau lam a chau le basam, gim le haksa te,lungkimna mu zolo te chuleh hinkhua leh hinna umzia le hedawk zo talo a lungngai lungkham tak a um i hi chun Jesu’n ei kona ahi. Zia Kona hi nang JESUN’ a hung kona ahi! I kisap leh i dangchakna Jesu’n a hechian hi. Ama kiang a chia dingin ei chial zing nalai lai a hi. Jesu kiang lo ah i la chia khak a, lampi chuam i la hawl khak chun le kisik in JESU lam zuan hitiu. Setan in khawvel thil takin chawmkhat sung nawp sakna ding in ei them sek hi. Setan thâng awkna apat pawt ta ding in pan la thak hitiu.
Dangchâk tapo te ka kiang a hung un.. Isai 55:1
SAM 42:1-2
Sakhichal luicha tuiluang ducha, a hat dûp dûp gual in, aw Pathian, ka hinna hi, nangma thangai in a ha dûp dûp hi
JOHAN 14:6
Jesu’n a kiang in, “Keima hi lampi leh thutak leh hinna ka hi. Keima ah chia lo chu kuama Pa kiang a tung puau hi.
MATTHAI 11:28
Nanghaw sêmgim leh puakgik paw zosiate haw, ka kiang ah hung un, keima’n a la chawldam sak ing ka.
2. TUI HUNG DAWN HEN
TUI DAWN ti umzia chu JESU chu lunggil tak a ging ding tina ahi. Thagau Hukdamna dingin JESU bep i gin (faith) ngai ahi. Thilpha thilhoi ahiloleh nasep pha(good works) hung bawl zo phawt inla ka kiang a hung in Jesu’n ei ti hilo ahi. Dangchâk hukdam ngaicha ngen i hiu in Jesu tilo kua man ei hukdam theilo ahi. Pauchap thiam leh thugen thiam ten le hukdamna ei pia theilo ding u ahi. Kuama panpina le ki thuapina a poimaw puai. Khoitak mun a um hilechun le Gitlo hi kisik a, JESU lunggil taka la ging chun hukdam hi ding la hi. Piangthak na testimony a ngai khel khel puai. Certificate leh kuama hetpi-genphat le a ngai chuam puai. Nang taw Jesu kikal ahi tai! La umna mun a khan lunggil takin Pauchap in JESU a hita ding in ki pedawk mai in aw. Zia chu a hun tawk hi.
Jesu’n mimal takin ei ko chiat ahi. Jesu’n midang kiangin va chia masa un ei tilo ahi. Direct tak a Ama kiang zuan dingin chuleh ama ging ding in ei chial zaw a hi. Pauchap thiamte ki pauchap sak masau’ in ei tilo ahi.Camp leh crusade te a va lut unla thugen thiam te thugen va ngaitha masau in ei tipu’an chuleh Sakhuana dan leh dunte hung zui masau in ei ti diaklo ahi.
THUPUAN 22:17
Chuleh, Thagau leh mo chun: “Hung in,” a tiu a. A he tapo chun, “Hung in,” tiu hen. Chuleh, a nuam tapo in hinna tui hi, a thawn in hung dawn uh hen
JOHAN 6:35
Jesu’n a kiang un, “Keima hi hinna vaithum chu ka hi, ka kiang ah hung tapo chu a gilkial ngai pua’n tin, ei ging tapo chu bangmatik in a dangchâk ngai ta pua’n a
EPHESA 2:8-9
[8] Lungsiatna ziak ah ginna ah chun hukhin la hingal un; zia chu nangmau ah kipat pawt hilo in, Pathian thilthawnpiak ahi zawi. [9] Thilhi ziak ahi puai; chutilochun mi kisuang kha’n au
Khawvel in vang taksa thanawpna thil tam tak pia ding in ei chial zing ahi. Hinla Thagau lam i dangchâknau ei huk dim sak theilo ding ahi. Zuau leh damtheina ding a hoilo tui chi chuam chuam khawvel in ei pia thei a hi. Hinla zia haw chu Kumtuang gawt mun ei pui luttu hi ding a hi.
Jesu Khrista vang kumtuang thil ahi. I thagau hukdam theina um sun chu JESU bep a hi. Tui hing, damna tui chu JESU kiang bep in a um hi.
Lalpa Jesu’n Judate haw’n kut amat dan uh leh sakhua thil a bawl teu chun hukdamna atun lo ding dan amu chian ma ma hi. Bang gual tukin sakhuana thil ah dan leh dun te chuleh Mosia dan te phatak in zui leu le JESU a ginglo uh chun phachuam lo ding a hi. Dan a hukdamna a um pua ngal a! Jesu bep a hukdamna um ahi!
[11] Zia Jesu chu, ‘Nanghaw Insa mite’n la suang doi lo uh kha; a kil ah suang poimaw pen in a hung pang tai,’ a tia. [12] Midang kuama kiang in hukdamna a um puai, van nuai mihing minsak lak ah ei hukdam thei ding min dang piak in a um pawngal a,” a ti’n
(NASEPTE 4:11-12)
DAWTNA POIMAW
Johan bung 7 chang 37 na hi Lalpa Jesu kammal ahi. Van mi hiding leh Van thil a chialna poimaw tak ahi. Tuni hin nangma ngei ngei JESUN’ ahung chial hi. Tu hun ahin Jesu’n ei chial vek hi. Tu pet ahin Jesu Kona (chialna) ngaisak lo a umsan thei gual a kilang maithei i hiu hi.Khristianna Pathian thu taw khawvel thilte kawp thiam kisa tawk mai thei lahi unau, hinla la dinmun dik tak chu lungkham um ahi aw. Pathian them zolo ding lahi. Pathian tawtna bawl haisan hun tak zet ahi tai! Lalpa ni ahung tung phat le Pathian ma ding i ding ngam na diam? I thagau dangchâkna Jesu bep’in a sudim(quench/satisfies) thei hi. Jesu lo mi dang leh mun dang i hawl chun athawn hi ding i hiu hi.
Nisin-hunsin in khawvel nawpna leh thepna te nusia in JESU nai zawk zing gua hitiu. Khawvel nawpna te kithep lungmuang sak zianglo in JESU nai zing ta ding in pan la thak kit hitiu. Tichun JESU zal in ei a pat hinna tui luang dawk tan tin zia hinna tui chun khawvel thim leh keu zota PATHIAN HEPINA GOSPEL in suk hing leh salvak in hung um ding ahi.
I Thagau dangchâk dan uh ki hedawk ding leh Jesu’n ei Kona sangthei dingin PAUCHAP in Pathian panpina dawn zing hitiu. LALPA PATHIAN in ama lopina ding in ei malzawl chiat tahen aw.
@GL Muana
