3rd Oct 2022 | Kanam Vaiphei
ZILLAI SHILLONG IN ANNUAL CONFERENCE- CUM-FRESHERS’ SOCIAL MEET MANG
Shillong, Oct. 01 (Nisin Thuhiltu) : Zillai Shillong Block (Vaiphei Students’ Association) in tuni, 1st October, 2022 in Umpling Dorbar Shnong Hall, Umpling, Shillong ah 41st Annual Conference –cum- Freshers’ Social Meet 2022 a mang hi. Zia hun chu Special Guests hina tawh Dr. Kamthamuon Neihsial, MS Surgery, NEIGRIHMS Shillong ; Thangkhawmsang Duhlian Branch Manager SBI, Kench’s Trace Shillong leh Kamlalbel Neitham, Regional Provident Fund Commissioner -II EPFO, Ministry of Labour & Employment Govt. of India, Shillong te’n a uap ui. Hun matna Session II ah khen in, Session masa chu formal tak in a mang ua, Session panpina chu laa leh lam tawh kichawlimna’n a mang ui.
Special Guests leh Zillai Shillong Block President, Secy. leh Advisors te’n meisel detna nei in, Zillai Anthem sakna tawh hun matna a kipan a, Upa Dalkhohen in pauchapna tawh hun matna a hawng hi. Tv. David Paulalmuan, President ZSB in vaidawnna thucha gen in, Zillai Shillong Block lawiupa te puanlatna a nei hi. Education Dept.,ZSB malatna’n Zillai Meritorious Awards for Class X & XII piakdawna a um a, Zillai Shillong Block member sepna muthak te kipakpina le a um hi.
Meritorious Award dawngte lak in Class X ah Zillai 14, Class XII ah 6, Under Graduation (Bachelor’s Degree) 20 , Post Graduation (Master’s Degree) 3, Bachelor of Divinity 6 a um ua, sepna muthak kipakpi ah um te chu mi 13 a hiu.
Tv. David Lamson & Nk. Julie te’n Freshers’ Introduction bawl in, Mr & Miss Freshers’ telna a um hi. Special Guests leh ZSB Advisor te judge ah pang in, Mr & Miss Freshers’ a tel ua, Mr. Fresher ah Tv. Kamsanglian teldawk in, Miss Fresher ah Miss Dawn Niangthiankim a teldawk ui.
Pastor James Th. Minlun Vaiphei in Freshers- te pauchap piakna a nei hi. Nisin Thuhiltu
Hun matsung in, Lamzakai Vaiphei, Chairman VWA, Shillong leh Special Guest-te apat thugenna um in, Zillai Shillong Block Cultural Troupe te’n Nam lam suklatna a nei ua, laa sak thiam chuamchuam – Nk. Sarah Hatlalkim Vaiphei, Nk. Esther C. Neihsial, Nk. Kim Gracy Vaiphei, Tv. Benjoy Vaiphei, Pu Khaisonthang te’n laa a sau. Nk. Victoria, Spice Angels, David Lamson (MCP Crew) te’n lam (dance) in talent show a bawl ui.
Zillai Shillong Block vaipua thak ding telna le hun matsung in a um a, election result dungzui in, President – Joyhills Duhlian; Vice President – David Paulalmuan Vaiphei; Secretary -Thangsanglian Vaiphei, Jt. Secretary -Bliss Tingneihat; Finance Secy. – Kadam L Chawnmang, Asst. finance Secy. – Lamlunmang Vaiphei leh Treasurer – Kimgracy Vaiphei te ahiu.
