ZILLAI CCPUR IN COMPENSATION CHUNGCHANG A LEMLO UM TE SULEM DING IN HIATSAK

27th Feb 2021 | Kanam Vaiphei

ZILLAI CCPUR IN COMPENSATION CHUNGCHANG A LEMLO UM TE SULEM DING IN HIATSAK

Zillai CCpur block in lampi kekletna a compensation chungchang thusua a bawl hi. Zillai CCpur Block in zani thusua a bawl in a taklatna ah February 22, 2021 in District Administration kiang a lekha pialut in “Zillai CCpur Block Fack-Finding Committee on Survey & Compensation” report dungzui in compensation chungchang a lemlo umte bawllem ding in chialna a bawl ui.

Compensation chungchang a thildawt uh sepdaw masia Tualnuam apat Buallian kikal lampi siamna khak ding ahidan le hiatsak in a um ta, development work dodal ziak hilo in District Administration thilbawl diklo sukfel ding dawina ziak a kibawl ahi ziakin mipi’n hiathiam ding in a chial ui.

Zillai in a thil dawt uh sukpitisak ahi masang sia nasepna chawlsak hiding, District Administration in thagum mang a nasepna a sutzawp guat hem ahiloleh ki-hiatlosak guat ahileh maban a kiphinna sangzaw pat hiding hi’n thusua in a taklang ui. Kiphinna nei ahi a thiltung dawi umlo a tungkhak leh District Administration in maw a puak ding hi’n le Zillai thusuak in a taklang hi.