*THUANGPAK LEH THUANGGUA*
-KL Muana Vaiphei
Malai pi leh pute chun tha ki hei dan en in kum a la sim uh ahin, khawvel ahung changkan dungzui in Roman- catholic or gam khat kum sim dan I hung zui ah, calender leh chungtha ki hei dan kibat lo na a hung tam ah, kumhei simna I gen kim zo pua, Tuni I thupi ding a hile ‘THUANGPAK’ leh ‘THUANGGUA’ um dan neu khat vak tak lang hitiu awle. Chung sawltha aki hei dungzui in pawltak ahung tung a bu leh bal, thaichi, chi chuam chuam te I kum khat loma a um kham kham I la khawl ah, pawl tak I hung tia, I luak khawm kham kham pawltak in I la khawm ah, I bu le bal leh thai ga I lak khawm te kipak et sakna’n KUT ahem bawl in Pathian kiang in kipak thu I gen sek hi.
Zia thing leh pak chi chuam te chun pak leh ga ahun sua un, ganhing te leh mihiam te’n I kipakpi ma ma, siamtu Pathian ngei le a kipak ding gingchak a um hi. Zia hun a pat chun mihiam te’n le kumthak thai chin didan liluang ahun nei ta ahi. Zia gual bawk a chun thingpak chi chuam te chu a pak zu chawp in khuai leh vachate a lim ma ma un, tichun chawmkhat zaw in suan leh pak nei gua ahun kilaw tak uh leh ahung ki suan tua tau a, March- April vel in suan leh pak ahun nei pan sek ui.
Tichun kumlui leh kumthak hung kipat kitna ding kum lui a I tha lakte del ding in Pawldel gua ahung sek hi. Tichun, thai chi lo hingte le hun chuai in a hung keu pantha, nathak in a hung kisang guan, THUANGPAK te leh thil hing tamtak ahun sek ding in ahung kisa, tichun thingna te a hun sel ah, a hung dawn ua, pak chuam chuam leh ga nei te pak a hung pak ua, zu le va te’n ahun bawm in, nek hawlna’n ahung mang ua, ga tam tak a hun sua un, ganhing leh mihiam te’n nek leh chak in I hung nei sek uh ahi.
Thaichi pak hun leh mum hun ki bang lo le a um ah, zia te haw chu le ahun ahung tun phat le a chung a te gual ahin hinkhua a mang sek uh ahi. Pathian thil siam te hi hunbi kibang le a um ah, a kibang lo le a um a, zia te hin Pathian lopi a sulang sek uh ahi.
Zia a chung ah pawldel gua,Thuanggua leh khawkhal gua hung kipat ding hi thil siam zosia’n ahung tung di hi a he lawk ua, amau a ding chiat in kising sakna a nei chiat ui. Zia a chung ah thute hin Pathian leh a thil siam te khankhua di leh makhua ding hi a guanggal ahi. Zia Pathian lopi dan leh a kumtuang lemguat dan hi mu leh hiat thei ahi.
Zia te chanchin leh gual dan apat ahin mihiam te zia haw sang ah chung nung zawn ei siam a, ei ma I kihetdaw thiam a Pathian lem guat hi I hiat thiam chun a lopina leh a thil siam te etkawl dan thiam leu hin I nau le kitup tak ah ki en in, a ma lopi zia sulang tu, khawvel chawihawitu leh chawihawi ding ah siam I hi dan uh he dawk a, leisiat hi Vangam ah siamtu te ding I hiu.
