PUVAWM LEH THEICHE
By: K L Muana Khaute
Malai ah I pu leh pa teu chun Puvawm chu milian leh hat mama in ala gen ui. Ama hi mi nunnem leh mipha tak chu ahi. Mi lungsiat thiam, mi tawmngai, mite khawtua thiam, panpi-tu leh ngilnei tak mi ahi. Mi zosia hi taksang, gingcha leh lungsiat mi ahi.
Mipha leh mi tawmngai, hepina ah dim, mi khawtua thiam tak ahi. Himaleh, mite’n a phatna ziak leh a ngilneina ziak in mihiam ngai-phalou neite’n mi-ngawl leh kanang gual ah ngai in a simmawu a, tawt bawlna’n a mangsek ui. Himaleh, a lungsiatna ziak in mualphonate a tuak ah, a hepina leh khawtua thiam ziak in thina hial le a tuak hi. A ngawl gual in kilang maleh a hepina leh mi a taksanna ziak in a hinna a chan law ahi.
Mi kuale hepina diktak neite chun a lawipha leh mi dang leh a chi leh nam a ding in thi a ngam ah, amau gual ah gin-umte ziak in khawvel leh eile I dam ham ham ahi zawi. Ziaziak achun, heipna leh ki ngainatna thitiang ah khan-gual a di’n a gin-um leh Pathian a ding ah, gin-umte chu lawtinna a changsek uh ahi. Tichun, I lungthim phallo chu nusia in, Pathian in thilpha sem ding ah ei dawi hi. Zia thilpha chu semthei zing ding in Lalpa’n ei pui zel tahen.
