MIHIAM HINKUA A POIMAW THUDIK PANGA (5 )TE
Mr GL Muana Neitham
Zia anuai a kipe thudik panga te hi, mihiam khat hinkhua a het ding ah poimaw mama ahi. Ngaidan kigen ahipuan, nialna ding umlo a thudik (FACTS)ahi.
1. LEISIAT MIHIAMTE HI GILO/SUAL VEK IHIU HI (WE ALL ARE SINNERS)
Nang leh kei nawp le nawplo, ut leh utlo thu a hitheilo in SUALNA/ GITLONA nei vek ihiu hi. Ka hoi hi, ka phai, thilpha thilhoi kabawl hi chuleh kuama siatna ding ka bawl puai ti a thiam kichan thei kuama i umlo ahi. Lalpa Pathian ma chun sual, buak leh gitona nei, atinglo ngen aki hi vek hi Lalpa Pathian ma ah iki suanpi ding bangma umlo ahi, a um sun chu i gitlona leh misualna ihi nau hi ahi zawi.
“Kuama midik a um puau in, pakhat chale a um puau hi. Kuama a hethiam a um puau in, Pathian hawl him himle a um puau hi. A leng un lampi chuam ah a pêtmang zo tau in, bangma phatchuamna bei in a um sik sek un; thilpha bawl him him a um ta puau in, pakhat chale a um ta puau hi. mi zosia’n thil a hikhial zaw tak ziak un, Pathian lopina a chang zo talo uh ahi
ROMTE 3:10-12, 23
Ngaitia, khawlona hin ka hi, ka nu’n ei vop ah kipat in, migilo ka la hi tai
SAM 51:5
2. KHATVEI TEI CHU THI DING VEK IHIU
Mi hausa leh genthei, aneu leh alian, mipil leh mingawl khen chuam umlo in khatvei tei chu leisiat a i hinkhua uh hi bei tei tei ding ahi. THINA tuak vek ding ihiu hi. Ka ki man nai deu puai ti um theilo, ka hausa in chomcha vak postpone naklai ka ut hi ti umtheilo ding ahi. Pathian hun tiam chu atun phat leh THI himai ding ahi. THINA hi chu Pathian cha hina chang,hukdam chate,Khristian diktak Pathian Lekhabu sung a min umte ading achun lopina kipatna hiding ahi.
Piangthaklo, Khristian lem te ading in vang kumtuang gawtmun kipatna ahi.
Zia dawtna hi vak ngaitua tiam in Unau: Pathian Belamno Hinna bu achun lamin a um na diam? Zia tak mun achun Pathian in min alam phat tak leh um ngei ngei ding in Piangthak diktak, Khristian lem hitalo ding in…ahun um Lai hin LALPA JESU bel mai hitiu e maw Unau👏
Gitlo man chu thina ahi’n, Pathian thilthawnpiak ahileh vang, Jesu Khrista, I Lalpau jal ah kumtuang ah hinna ahi
ROMTE 6:23
Mihing â dingin khatvei thi guatsa ahi’n, ziazaw chuleh vaihawmna um in a
HEBRAITE 9:27
Chutichun, mi pakhat ziakin gitlona khawvel hin a lut ta’n, gitlona ziakin thina a lut in; zia gual ma chun mi zosia migilo I hi tâk ziak un thina’n mi zosia a zen suak tai
ROMTE 5:12
3.VAIHAWMNA MA DING VEK DING IHIU HI
THI zaw achun Pathian vaihawmna tuak vek ding ihiu hi. Khawvel vaihawmte, police te, court a Judge te, Intelligence te,nek guk chakguk mante leh khamthei guithei zuak leh bawl mante haw leh adang dang THILPHALO bawl mante, dan tawh kikal a khuasa manten AMAT phaklo, ahet daw zawlo teu kha PATHIAN MA KICHIAN tading ahi.
Khristian lemte hinkhua matdan, khawvel dan in aphallo bep hilo ah Bible kal a aguk agal a sepna hawl leh nei, nek leh chak hawlna dik taklote, Pathian min kiselna mai mai a mangte, Lalpa lalgam ding lak malak sang ah ama nawpsakna ding lalgam(empire)sa leh buaipi Pathian nasem kitite leh adang zosia zia ni phat tak chuleh KICHIAN mama tading ahi
Tuni hin kuaman nang la phatlona leh diklona hung gen khel kileu le Unau kingaitua in! Thutak gen ut leh ki dawisakna dik tak a kiam in avang ta mama ahi. Pathian thu diktak gen sang in, a ngaitha tute ngainop leh kipakna ding gen ut atam zaw tai Diklo tak a hinkhua lamat a, diklo tak a sum le pai hawl a, diklo taka insung te vak leh chawm lahi chun kisik in…LALPA’N AHUNG MUCHIAN MAMA HI.
Mi zosia’n taksa I thilhite, a sia a pha, I hi gual gual un I mu chiat theina ding un, Khrista vaihawmna chutpha man kilâk chiat ding I hiu
2 KORINTH 5:10
Aleh, nang in bangatia la suapi chu gensia la hem? ahiloleh, bangatia la suapi chu musit ziang la hem? I leng un Pathian vaihawmna chutpha ma ah ding chiat ding I hingal un. Lalpa chun, “Mi zosia ka ma-âng in bokkhup intiu in, lei zosia le Pathian pâkchâtna pia’n au, ti’n sia ka sam hi,” a tii, tia zik ahi ngal a. Chutichun, I leng un Pathian kiang in eimau umdan chiat kipuan ding I hiu
ROMTE 14:10-12
Mihing Chapa chu a vansawlchâkte tawh, a lopina kithuam ah a hung tak leh, a lopina lalchutpha chung ah hung kichu’n tin; nam zosia chu a ma-âng ah kikhawm intiu in; amau chu belampu’n, kêlchate lak ah belamte a khendaw sek gual in hun khendan in a. Tichun, belamte chu a changlam ah koi intin, kêlchate chu vang a veilam ah koi in a. Ziaphat chuleh, Lengpa chun, a changlam ah umte kiang ah chun, hung un, nang haw ka Pa maljawlna changte haw, khawvel siam lim ah kipat nang uh â ding ah siam gam chu lua tau in; ka gil a kial in nêk ding lei piau a; ka dang a châk in dawn ding lei piau a; malzin ka hi’ in lei zin tun un; ngawnchang ah ka um in puan lei sil sak un; ka damlo in lei ve’thau a; suangkul ah ka um inle lei hung kanthau ah, ti’n tin. Zia hun tak chuleh midikte chun, Lalpa khoi tak ah gilkial in ka hun muu ah nêk ding ka hun piau ah a hem? Chuleh, khoi tak ah dangchâk ah ka hun muu ah, dawn ding ka hun piau ah a hem? La malzinna ah le khoi tak ah ka hun zintun ua, khoi tak ah ngawnchang ah um lai puan ka hun piau ah a hem? Chuleh, damlo leh suangkul ah la umna khoi tak ah ka hun kantha khau ah a hem? ti’n au. Lengpa chun a kiang un, titakzet in ka hil la hiu, zia ka unaute lak ah a neupen chung ah la hiu kha le, keima chung ah hi’ la hiu, hun ti ta’n a. Chun, ah veilam ah umte kiang ah chun, nanghaw hânsedawlte haw, diabol leh a sawlchakte â ding ah kiguanggal kumtuang meipi lam ah chun chia tau in; ka gilkial lai inle nêk ding lei pia puau a, ka dangchâk lai inle dawn ding lei pia puau a; malzin ka hi inle lei zintun puau a; damlo leh suangkul ah ka umna’n le lei kantha nuam puau hi, ti’n tin. Zia tak chuleh amau chun, Lalpa, khoi tak ah gilkial leh dangchâk in a hem, malzin ah leh ngawnchang in a hem, damlo leh suangkul ah le ka hun muu ah, ngaisak lo ah ka um uh? ti’n tiu in. Ziaphat chuleh, ama chun, titakzet in ka hil la hiu, ziate lak ah a neupen chung ah la hi’lo uh kha, keima chung ah hi’lo la hiu, a la ti’n a. Tichun, ziate lawi chu kumtuang gawtna chun sawl ta’n tin; midikte chu vang kumtuang hinna chun lutsak ta’n au, a tia
MATTHAI 25:31-46
4.Ei LEH EI KI HUKHING THEILO (We can’t save ourself)
Hukdamna chu Pathian apat leh Pathian thuneina bep ahi. Pathian Hepina ziak a AMA gingtute thilthawn piak chu ahi. Khrista Jesu a Hukdamna/hukhinna chu napha, nahoi sep ziak a law daw thei ahi puai. Hukdamna ahin nang leh kei in panlakna(Contribution) i neilo ahi. Ki hukdam theilo Pathian thunuai bep a (Sovereigntyof God in salvation)hukdamna um ahi ziak in,kei hi bangma lo mai kahi ti iki hiat daw ngai ahi.
I hatlo lai uh khan, a hun tak in Khrista chu Pathian helote a dingin a hung thi ta’n. Midik thasâng in kuama thi ngam khel pua’n au, mipha thasâng ah chun kua a hem khat bêk in thi ngam kha maw pua’n a. Himaleh, Pathian chun ei hepina chu a latsak ah, migilo I hi’lai ua, Khrista chu I sik un a thi ta ahi. Chutichun, a thisan ah thiamchansak I hi’tâk nung un, ama ziak man Pathian lungnatna kipat in hukhin in um ngei hitiu. A mêlma I hi’lai a bawn, a Chapa thina ziak ah Pathian tawh kicham I la hi tâk uh chun, kicham a I um tâk nung uh hin, a hinna ziakin hukhin in um ngei hitiu. Zia bep chule ahi puai, kichamna, tu’ ei musakpa I Lalpau Jesu Khrista jal ah hin, Pathian chu I suang tau ahi. Chutichun, mi pakhat ziakin gitlona khawvel hin a lut ta’n, gitlona ziakin thina a lut in; zia gual ma chun mi zosia migilo I hi tâk ziak un thina’n mi zosia a zen suak tai. Dan a hung um tiang ah khanle khawvel hin gitlona chu a la um zing ah, himaleh, dan a umlo lai ah khan gitlona chu gitlo ah ngai ei puai. Abang hileh, Adam ah kipat Mosi tiang in, Adam hi’khialna gual ah thil hi’khiallote chung ah le thina chun vai a hawm sek ah, Adam chu a hung um kit ding tawh te’kâk ahi. Ahi’n la, thilthawnpiak chu hi’khelna tawh a kibang pua’n. Mi pakhat hi’khelna ziak ah bawn mi tam tak a thiu chun, Pathian hepina leh mi pakhat Jesu Khrista hepina ziak ah thilpiak chu, mi tam tak chung ah vuk in um ngei in a. Chun, zia thilthawnpiak chu mi pakhat sukkhial ziak ah thil hung um chu tawh a kibang pua’n; thiamlo chansakna vaihawmna chu mi pakhat ziakin a hung um ah, thiamchansakna thilthawnpiak bo chu sukkhialna tam tak ziakin a hung um zaw ahi
ROMTE 5:6-16
Lungsiatna ziak ah ginna ah chun hukhin la hingal un; zia chu nangmau ah kipat pawt hilo in, Pathian thilthawnpiak ahi zawi. Thilhi ziak ahi puai; chutilochun mi kisuang kha’n au
EPHESA 2:8-9
Dikna lam ah I nasep dawteu ziak hilo in, tui ah silthianna leh Thagau Thiangtho ah siamthakna chun a jangaina dungzui in ei hukhing ta
TITA 3:5
5. KINEPNA LEH LAMPI UMSUN CHU JESU AHI
GILO leh sual ihi vek un ahi. Tichun THINA maitua ding vek ihiu hi. Thi zaw phat leh Pathian vaihawmna ma kilang vek ding ihi kit un ahi. Pathian ma thiamchanna ding in mihiamte chu amau leh amau thiamchan sakna kipe theilo; ki hukhing theilo i hiu hi. Hukdamna; kumtuang hinna chu ei thu leh ei dawi gual a mu leh ki piak theilo ahi ti aki chian in, zia Hukdama ding a chun LAMPI umsun chu JESU ahi. Vangam lutna ding in leh hukdamna ding in lampi khat bep a um in Zia chu Chapa Pathian Jesu ahi. Lampi chuam chuam zui in, thilsia thilphalo bawllo in, napha nahoi sem in, chaga gentheite panpi leng le vaigam kikai in a tite chu zuau thu mai mai ahi. Bible kal a zilsakna ahi ziakin thulaklo ding ahi. JESU ginna bep in hukdamna a chu a um ahi. Jesu ginna apat bep in Pa Pathian apat thiamchansakna a um hi. Jesu ginna bep in kumtuang hinna i neithei ding ahi. Tuhun ahin i lungthim ngaituana leh thinlung dik takin Jesu chu i Lalpa leh hukdampa dingin i GIN ngai ahi unau.
Zia ginna Pathian apat achun hukdamna i nei ding ahi. Hukdamchate chu PATHIAN CHATE ahitau hi. Pathian chate chu kumtuang gam lua dingte ahi tau hi.Kumtuang gam lua ding te chu THAGAU a PIANGTHAKTE, zia khawvel a khualzin, khawvel a khawsa nalai hinla khawvel a hitalo te chu ahiu hi
Jesu’n a kiang in, “Keima hi lampi leh thutak leh hinna ka hi. Keima ah chia lo chu kuama Pa kiang a tung ngai puau hi
JOHAN 14:6
Midang kuama kiang in hukdamna a um puai, van nuai mihing minsak lak ah ei hukdam thei ding min dang piak in a um pawngal a,” a ti’n
NASEPTE 4:12
Amau chu a puidok ah, a kiang ua chun, “Pute haw, hukdam ah ka um theina dingin bang ka hi diam?” ti’n a dong tai. Amau chun, “Lalpa Jesu Khrista ging in; tichun, hukdam in um in la tin, la Inkuanpite le,” ti’n a dawnhuu a
NASEPTE 16:30-31
LAMPI DIK, THUTAK LEH HINNA NEITU JESU GING TA DING IN Pathian Thagau Thiangtho chun ei mapui tahen aw AMEN
☦️KHRISTA LALPE’N SEPAI ☦️
THY KINGDOMCOME
