NUMEI HI | Thakau/March, 8th 2021 World Women’s Day ahi tawh kitawn in NUMEI TE chibai uhle

NUMEI HI💘

👰🧝‍♀️🤱🏼🙎‍♀️💇‍♀️👩‍❤️‍💋‍👩👩‍❤️‍👨👩‍👦

Thakau/March, 8th 2021 World Women’s Day ahi tawh kitawn in NUMEI TE chibai uhle🤝🙏🤝

💝💐🌷🌹🥀🌺🌸🌼💘

Bible changtel:
Thupilte 31:10-31.

Khawvel siamlim apat pawsal thawmhau lungleng henemtu ding ah Pathian in NUMEI HI ala guan piak ahi. Ei pau ah numei i tiphat le nupi, nungak a huap suak mai hi, zia chun numei pil leh numei mawl chuleh asiamtu Pathian hia leh helo in a kikhen sawn kit hi.
Zia kipat chun khawvel a mihampha pen pen te chuh nupha, nuching,Pathian hia nute zal in chate hih chanpha tak, tichuh chawnkhuang chung na tiang a chut khawlaw thei uh ahi. Ziaziakchun, numei hih cha leh te pawsal henemtu mipawimaw ma ma ahi na lawm lawm uh e maw…..!
Khawvel ah vaihawm thiam, milian milal, miching,mithiante hi…..a nuteu lawtinna zal chuleh Pathian hetna ziak tileu hin ki genkhial puan’a.
Ziakachun NUMEI HI innsung, khaw/veng adin mipawi maw ma ma khat ahiban un, pawsal sangin asusiau in asiampha thei zawu ahi, chuleh numeite hih pawsal in i zathuap thiam phawt ahileh nam chawisangtu, innsung siamhawitu ahi ban un a suminsiatu khat le ahi kit thei nalai uh ahiu.
A lul dan uh ahileh,kipak zing numei chun kipakna innsung asiam ah, kipakna innsung chun kipak zing chapang a seilet sak hi. Kipak zing khaw/veng chun khawvel kipakna leh chamna a chansak sek ahi.
Chun numeiten anngawl ah Pathian buan ah mitthi vakit kit ah a pauchapna teu ziak ahin innsung, kochuam chuleh namsung hih dam liai liai ahih dia aw tibang hih gello theilo ahi.
Numei phatak ihung hih theina dingin NUNGAKLAI hun kitihi hun mantam pen pen khat ahin,Pathian dawi gual ah hinkhaw mat a ngai hi.
Tichun, Nungak melhawitak chuh pawsal zosia thinlai nemtu khat ahinai maleh numei melhawi hih Pathian thil thawnpiak lopi tak khat ahin, numei melpha umchan, khanchan helo nu chuh vawkpi bil ah sana bilba basak gual mai ahiu.
Zia gual achun numeiten alul dan uhleh alopi dan teu hih hethiam suak taleu,numei gilo leh phalo um dingin ka gingcha puai. Numei pil/ching tapawu in ah innchen a siamhawi un numei ngawlte ahiu levang….ama khut ngei in aphezak sek uh ahi.
Chuleh numei unchanpha chuh a pawsal adin lallukhuk hawitak ahin, numei umchanpha lo tak te chuh pawsal gu muat saktu ahi kit ui.
A hileh, kua hem, numei pha muzo ding…..a maan chuh suangmantam pen, sang ah le maantam zo hi ngal in, zia gual tuk ah maanpha hingal ah Khristian nupha hiding le gel phalo, a ma nawp dan dan ah tacha, khawvel nawpsakna ngaina taluate chuh pawsalte dingah lawsapna ahi ban un, vaihawmtute dingah le lungzin gentheina atut thei uh ahi.
Ziaziakachun, numeite hin la lopi dan uhi hethiam unla, innsung ah cha leh te chung ah pawsal sangin la mawpuak uh alian zawh ahi.
Khawvel ah innsuang zosia te kinepna chuh NUMEI HI AHI… Kuale numei phatak hih lanawp chun nunnem inla, umchan khanchan thiam inla,maitai sieu siau inla,engtat ching him him kin, la umchan leh la kichei dante chuh la Culture/ Custom tawh kituak sak inla, nangma ziak ah midang namdangten ei mupha thei ah chuleh ei musia thei ahiu ti hemil zianglo in, ching leh pil keu in, lunggil leh taksa thiangtho tak in um zing inla, chisuantu la hin chiphalo suan dingin kih ngaitua/lunggel kinla, la lopi dan sana suangmantam pen sang ahle mantam zawna lai chuh mansua ngailo in, kisathei leh kiletsak him him kinla,kamthiam in, mi muok(welcome) dante thiam inla chuleh la innsung, kochuam leh nam adingin la pak hawina chuh vulzing dingin zia chuh ahi NUMEI HI.

Aziktu:
Pu.Ginlalthuam Vaiphei
“LALGIN INN”
Mualngat Innpi
Khualzinna Gam
(LALPA A AHI)
PO/PS Moirang -795133
💝🌹🌷💐🌺🌼🌻💘
Zia article hih ka tangvallai tichuh…..PUC 2yr, Ccpur Govt. College (1985 ) ka sim kum ah ka la zik ahi.