Mothers day Message
*NUTE NI HUNGKIPAT DA’N leh NUTE MANTAM DA’N CHANCHIN CHAWMKIM*
A masa’n tuni NUTE NI(Mothers day) muthei leh changtheina laidinga famna pha leh hunpha eimusaktu I Lalpa jesu Khrista chu lopina changta hen.
Awle, Tuni I thupi ding uhi, *”NUTE NI HUNGKIPAT DA’N LEH NUTE MANTAM DA’N”* ti thu igen masang un, Nute Ni hungki matpat da’n achawm theilam in vak taklang masai tiu aw.
*NUTE NI* ala pandawktu hi *Anna Jarvis* ahi. Anna Jarvis hi Anna Marie Jarvis leh Granville Jarvis chate 11 te lak ah a 9 na ahi. Unau 11 lakin mi 4 techu apitin tiang un adam chiat ua, adangte chu aneulai un ala beitau ahi. Anna Jarvis hi May 1,1864 kum in Webster, Taylor Country, West Virginia in apiang a, kum 84 ahi in, November 24,1948 kum in ala mualliamta ahi. Anna Jarvis chu kum 12 mi ahi lai in, anu hin School a Class alakna’n zia gual hin agen hi. *”Kua ahem in, bangtik ahem leh Nute hetzingna ding ni khua, mihing hinkhua ah anasep phat teu leh akipum piaknau genlat theina ahun siam uh kaki nem hi,”* ati chu alunggil in akawizing a, ala tepte zing hi. Anu pauchapna leh duthusa’m chu ahezing a, ziathu chu anu thi ni’n thanmual ah asuapi pa’n ahet nawnsak kit hi. Anna Jarvis nu Ann Marie Jarvis chu 1905 kum in a labei tai. Anna Jarvis in 1907 kum in US gam pumpi Nute Ni mat theina ding nasa takin ala tangko pi hi.
Ann Jarvis Nu thi Champhai niveina’n anu zana(respect) Andrews Methodist Church in a lanei a, a kumkit 1908 kum in Nute nichu ama chenna khawpi Philadelphia in matpat in ala umta ahi. Kum 1911 in Nute Ni chu Gambung chuam chuam leh mun chuam chuam in mat in aumta ahi. Kum 1914 kum in President Woodro Wilson in kum sin a May Pathianni nivei na hi Nute Ni a kimang chu, gamsung pumpi chawlni hiding inle puandawna ala neihi. Ziachu tuni tiang hin Kochuamte’n Kochuam Nibik pawimaw te lak a pansak in kumsi’n in I hun mangto tau ahi.
*NUTE MANTAM DA’N LEH LULDA’N*
Tuni hin Nute mantam da’n leh lulda’n hi vakngaitua thak kit hitiu. William Carey chun, *”Sungkua’n kipakna leh limna Chabi kawltu chu Nute a hiu”* ti’n ala gena. George Herbert chun, *”Nu pha pakhat tawh ziltirtu 100 akibangzo hi.”* ala ti kit ahi. Tuni’n Nute mantam da’n vak ngaitua thak kit hitiu in Pathian kiangin kipakthu gen hitiu. D.L. Moody chun, *”Khawvel ah Nute zosia hi keinu gual hileh, Suangkul(Jail) siam ngaipua’n a* ati kit hi. Zia hin banggual tuk a Nute hi mantam leh Lul ahiu em ti eimu dawsak thei hi. *”Nute umlona khawvel chuh, tha-lek gamkeu a tui umlona gual tawbangbep ahi.”* ti’n Napolion Bonarparte chun ala genkit hi. Khawvela mi lawting tamtak tehi Nu pha aneiziak uh ahi nuam hi.*(Q) A leh Nang bang gual Nu hi in laki he emle??* D.L. Moody ngei inle “Ka lawtin na thuguk chu Nu pha kanei ziak ahi” ala ti ahi. Zia Nu pha igen zinglai un Innsungkhat Nu ahilo leh Innsungkhat Mo hi ah, Chate Mo te/Tekpi/pu te haw mu nawp leh ngainat theileh ettawn tak thei in hinkhua la mang na em, ti in dawtna kinei leuhin bangti gual gual in dawn huna aki dawng diam tivang chu ki gentheilo chu ahi. Eima apat a bangkim chu hungki langto jel maiding in ngaitua phawt mai hitiu.
A banghi taleh, I Nute’n agilpisung ua eivawplai un, nang leh keiziak in aduchakteu le ne ngamlo in, damtakcha I hungpian theina dingin thi mun sual in natna sangpen ahunthuak uh ahi. I khan hawitheina ding un nawitui in eivak ua, chate angaikhawkna ziak un apha pen, ahawi pen aki chawk ngamsek puau hi. Ka imut theina dingin zan bangzat ahak diam, tu ladinmun tiang latuntheina ding ahin banggual gentheina ala thuakdiam uh ti la ngaitua khasek em? Nute hepina lahet thiam chun Lalpa’n hun malzawl ngei ngeiding ahi ti hemil him him kin. Nu jep lahem, Nute lungthim sunatu lahem tuni hin Nute kiangin Ngaidam dawn hitiu. Ziachu malzawlna hungkipatna hung hiding ahi. Nute chungin kipakda’n zilthak hitiu in, I Nute chiat chawihawi gua hitiu. Nute ziakin Pathian kiangin kipakthu gen hitiu. Keigual a Khawvela Nu neita lo ihi khaktak inle eila chawiliantu I chunnu chungin kipakthu gen hitiu Pa angsung apat in eila thilzing in eila muzing ding ahi.
Chuleh, ivak het kitding khat uchu, Pate zosia’n le Nu mantam da’n leh lulda’n ngaitua thakin, Nute chung a kipakthu gen in, chawihawina pia hitiu e.
Numei Pathian hemi, Pathian dawida’n a hinkhua mang mite chu aza um un, Chawihawitak himle ahiu. Khristian Nu pha lahi nuam a, Nu lawting lahi nawpchun, amasa pen in Pathian tawh laki kal sufel masa phawt in. Pathian chu lavei leh chang in umsakzing inla, la nungleh ma ahunvengtu’n pansakzing in. Zia bible changhi vakngaitua chiat hitiu. *”A chate a hungkipan un. “Mi vangpha nu,” atiu a; apawsal le ahungkipan a, apakcha, “Numei khawsak da’n thiamtak aum ui, himaleh, nanghi lapha chungchuang pen hi,” a tia (Thupilte 31:28-29).* Zia guala pawsalte leh chate Chawisan thei, kipakpi thei dingin Nute zosia iki chial uh ahi.
*Simtute zosia Lalpa’n eimalzawl chiat tahen..(🙏)*
*||HAPPY MOTHERS DAY CHIBAI ||*
