*LA PUAK GIK LEH HAKSATNA ZOSIA JESU’N KIPAKNA CHANSAK A NUAM ZING HI*
Khaile Unaute Jesu Krrista min in Chibai aw..
*Hunte, Nite leh kumte liam tozel maleh kei a hin thamuanna, lungawina dik tak a um thei him him puai la tini atam sek em unau?*
Zingkal thawh apat sep ding leh bawl ding tamtak semto zel maleng, kei a hin lungkimna diktak chu aum thei diak puai lati sek em?
*Dam laini chawmcha hi chu zia gual ahi mangliam to zel mai ding aki hin, thi ngak mai chu kahi mai hi lati hun a um kha sek em?*
Bible sim ah Pathian thu ngaitua zing hi kanuam nan, Bible kavak phet tei sek vang in chuh, ka sim pei ma ma puai latisek em?
*Khawvel Sum leh pai hawl thei dan dan a hawlin, theitop sua in kapang nan chu, ka sunggil lam ahin vang limna diktak a um puai latisek em unau?*
*Thi ding hi lau um ma ma khat chu ahin, khatvei tei chula WARNING um masa loin ki thi phut mai ding ahin….THI ziang taleng Bible in Van gam ati na mun chu katung nadiam aw tin la ki ngaitua kha sek em le?*
*Pathian hukdam chate zik lutna bu achun la min a um na diam le unau? Gitlo kisikna dik tak la nei na em? Jesu ka ging hi, ka puachap sekin, ka kikhawm sek in,thawlawm le theitawp in kapia sek nai lati em?* Zia cheng chu Pathian melma, thim lalpa Setan leh a nungzuite ten le gingcha in bawlthei ahiu hi.
*Krista Jesu a lahi em? JESU’N nang a LALNA a chang na em unau?*
*Ahiloleh Krista Jesu chu nang a, nang kipak na ding leh nang lemchang dan dan a mangchak ding khat a lanei ahem?*
*Thagau Thiangtho a piangthakna diktak leh Baptisma chan um zia le hechianlo a, Khawvel mite kochuam ki lawikhawnna mun a thamuanna nei mai lahi em?*
*Leisiat a kua hem lawi upa khat le ni mit mei veng leh Pastor kiti te lunglam hawl a, amau kipakna leh pakchatna lamu khan Hukdamna um puan tin, van gam lampi zawt malak sangin melma setan ngawngkawl kibat khum tua tina ahi.*
*Awle UNAU, La Lunggel lungkhamna zosia, la haksatna le dahna zosia, la lau thongna leh dipdap nate zosia, lenggual chanpi pha zolo laki sakna zosia, thinung ading la ngaitua a hukdam lahi leh hilo laki hetchianlo na zosia, kipakna leh thamuanna dik tak lanei lo na zosia kha NUSIA inla;
*Lalpa JESU kiang in pauchap inla, bangkim Tut mai in…..*
*La buaina, haksatna le taksa leh thagau, la lungthim leh ngaituana zosia Jesu ading in ki pedawk in, ki surrender mai lechin kisik puanla aw unau…..Ginglel him him kin Jesun’ nangma lampi ding ngaitua ding ahi*
*Lalpa Jesu muang in bel tawp mai hitiu, aman i khankhua ding uh ngaitua ma ma in, ei ngaitua piak zing ding ahi*
*Zia khawvel nawpsakna, nei leh go in vang kipakna diktak ei pia theilo him chu ahi maw…? Kipakna leh thamuanna diktak chu Krista Jesu kiang cho bep a um ahi….*
*Nanghaw sêmgim leh puakgik paw zosiate haw, ka kiang ah hung un, keima’n a la chawldam sak ing ka. Ka ngawngkol hung puau in la, ka kiang in zil un: Lungthim ah nunnem leh kingaitawm ka hi; tichun, la thagau â ding un chawldamna mu’n lau. Ka ngawngkol a nuam in, ka puak le a jang hi, a tia*
MATTHAI 11:28-30
*Lalpa nang ading in kahung kipiai, nang a kahi tai. Ka hatna, ka pilna, ka gitlona leh ka theina zosia tawh nangma kahung bel tai tin Pauchap in Jesu bel mai hitiu awle unau*
*Keima hi grep guipi chu ka hi’n, nang uh a bâkte chu la hiu. Kuale keima ah um ah, keile ama ah ka umna chu, zia mi ngei chun ga tampi a hun sua sek hi; keima lo in bangma la hi’thei puau hi*
JOHAN 15:5
*Lalpa ‘n lungthim ah kisik ngawi ngawite chu a nai sek in, kinepna neilote chu a hukdok hi*
SAM 34:18
*The Lord is near to the brokenhearted and saves the crushed in spirit*
Psalms 34:18 ESV
*Lungthim thak hun pia’ng ka tin, la sung ah thagau thak hun koi ta’ng ka; nangma taksa ah kipat suang gual ah tâk lungchang chu ladok ing ka tin, phe gual ah nêm lungchang khat hun pia ta’ng ka*
EZEKIEL 36:26
*Aw Ka Lalpa leh ka Pathian, simtu zosia leh keima ngei le, ka khialnau, ka sual lampi zawt zinglai ua apat Nangma lam a kihei thei tading in, la van Thangau in ka lungthim ngaitua nateu chiat in, na hung sem in aw.Nang chu ka Lal leh hukdampau hung hitan. Taksa leh thagau hinna thak ei pian. Jesu min in ka nii hi Amen*
Vanlam apat mit vakna, hetthiamna leh pilna Lalpa’n simtute ei pia chiat tahen aw…
GL Muana Neitham
*☦️KRISTA LALPE’N SEPAI☦️*
