NIALKALNA HI MUINGILNA AHI
_✍️ VLK Vaiphei_
Taksa leh thagau hinkhua ah pumpel theilo leh buaipi lo theilo, kihiatlo sak ziang theilo khat chu nialkalna (Criticism) ahi. Thupha leh thilpha a kigen hun ah le nialkalna ding um teitei- thuphalo leh thumantheilo aum lai ah le gen le sak nei tho tho um na khawvel ahi. A bang chu hileh zia nialkalna hi bang ahi em? Khawi ah hung kipan a hem? A hilo leh banggual thilpha lam leh thilsia lam a siamdawk thei em ti leh banggual ah mihiam te a ding ah thilpha a pawdawk thei em ti gen khawm ding I hiu.
Amasa’n Criticism hi bang a hem? Ei Vaiphei pau in a thumal hilchetna naipen ding chu “Nialkalna” hiding ahi. Mi’n thilkhat bawl henla zia a nasep chung ah ngaidan hawi leh hawilo na gen taleh zia ngaidan kigendawk pen hi khutideu leh khatideu leh ti ah nialkalna hi a tangpi’n chi ni a um hi.
1) Constructive Criticism- zia hih
ahileh a tangpi’n thilpha leh thilhawi ngaitua hun ah phazawding kawk ah thu kigen te a hi deu sek hi.
2) Negative Criticism- zia hih ahi phat leh a hawi le hawilo lam ah gendawk, thipha le a sialam ah thuleng kithangsak haw ahi sek hi.
Zia gual hun ah hiat ding khat chu Criticism hi bang lam hileleh a changtu te a ding ah kipak um leh ngainawp um a hisek lo ahi. Ngaituana lungthim a sukhak bep hilo in suangtuana hawilo tampi hungpianna le a hisek hi. Nialkalna leh demna ziak in thagau hinkhua ziang le nasatak ah basam saksek ahi. Zia gual criticism tuakte hi sunggil tak in kuama a kipak saksek lo ahi.
Ahi’n a langkhat lam ah guntak ah I ngaitua ding ua dawi um chu a hileh zia gual criticism thuak mualsua te chu taksa leh thagau in piting na, lawtinna leh maban khangto zel ding ah kalbi hawitak siamna a hisek hi. Mipil te’n midangt te nialkalna leh demna chu tep te tinten in ama apat zia gual demkaina leh hawilo na chu kisiam thak in taksa leh thagau lam ah hawizaw diak in a dingdawk sek uh ahi.
Khenkhat in mi criticism na te dawnhu lo in a sunggil in kisiam thakna a nei sek ahi. Zia gual mite a ding chun mi eulau na chu limlang (mirror) gual in a mang thei in, kisiam hawi zawk na ding in ki etthak na’n a um sek hi. Ahi’n lau um pen chu mi criticism na ziak ah puksiat khak ding ahi. Kingaisiat na leh lungkiak theina liantak hung pianna leh a hi sek hi.
Criticism hi pumpel sang in leh kihiatlo sak sang in midang te’n ei genna’u leh ei demna’u hi bang a hem ti ah guntak ah ngaitua leh etthak hi pawimaw mama ahi. Tulai khawtang lawi upa khat hingal criticism thuak theilo ti bang hi a tam mama ziang ahi. Vak muthei ding ah gamla lo ah ei gam sung ziang ah le kochuam lawi upa Pastor a hem, VPC/ Zillai/YVA leh a dangdang ah hingal ah, neucha mi’n a gensiat leh pawna mama ziang maleh bang kahia zia gual ah mite genthei ding ah um ka hem ti kingaituana nei theilo hi a pawitak zet ahi. Zia hi Lawi upa khat a ding in kisiam hawi zawk diak theina ding lampi hawi pen ahi.
I gamsung MP/ MLA/MDC mipi palai khat hingal sep dingdawl semlo ah mi’n a dem leh pawna mama lah sephawi le gaw diak lo. I hina a kigen khak phat leh mi zosia hina kisasek ahi. Ahi’n mipil te’n kisiam phatna a nei sek ua, mingawl te’n a gente a kinakpi sek uh ahi. Criticism hi maitua ah ei kisiamphat na ding ah kalbi hawitak ahidan hiat zing ding ahi.
A tawpna pen ding in mihiam te’n khawitak ah bang dinmun hitaleh thusuak dungzui ah Criticism hi lak dan leh pawm dan thiam in, kisiam thakna leh napha sepzawk theina ding ah lak ahi chun, masawnna ding ah kalbi hawitak hintin, damna leh khantona le hiding ahi.
