KITHAMUAN TUA LEU HIN LUNGNGAI A NEM DEU HI
Sa leh gal nei hun, dammaw hitan hun, natna hileng a um lai inle kingainatna, kisawmdawlna nasep thasuak lo in hakat zawsem leu hin damthei na le hisel intin, damkum le a sawt deu dia aw kati chang a um sek hi. Tulai ah natna hileng corona virus(pandamic) hi khawi tak ah hung kipan, kua te thil bawl, scientist te bawl ahiloleh mihiam te gitlona asan tak ziak ah Pathian gawtna ahem, politics ah kithepna mai ahi em ti thei hial in khawvel pumpi asu ling zo ta ahi. Zia natna hileng apat mihiam te kisum leh kiven ziak ah damkit ding I hiu em ahiloleh Lalpa kianga sualthupha chawi ah dam ding ahem tite hin ngaituana ah a um gel gel hi.
Zia corona hileng hi khawia pat hung kipan ah, tuni tiang dinmun ah do zaw lo di khawp ah mihiam te a ding ah melma hingal ahung na ding la kihelo, amel apuam la kihelo, bang ti do di, gal chu la hi galmuthei la hi lo beidawn um tak chu ahi. Gal tak tak ahi a, hiam leh meithal, neuclear weapon ah dodi hileh a do thei gam tamtak um ding ahi. Pathian kianga kuna dodi hitaleh sai-ip sil ah thi tiang ah pauchap a thum zo di le um ding in kamu ahi. Ziakachun, tulai dinmun tiang tiang ah I tuak leh hiat thei ah um thiltung te I vak ngaitua chun mimal tin mawpuakna ah kinga gual in a um ah, a thak ah kithununna leh kisawizawina pawimaw mama ahi.
Zia natna hileng hin khenchuam umlo in mi hinna alak bep hilo in khat leh khat kimuanna leh kitaksanna hung sutawm deu deu chu ahi ta mai hi. Khawvel ah khualzin ihi nau ahin, Thimlalpa vaihawm ah buai na ahung hilo na ding in, siamtu kianga chawlngalo ah kalsuan ding dan lampi hiatdaw zawk guat hi pawimaw pen in ka ngaitua ahi. Zia gual ngaituana um ziak ahileh khawvel mithiam miching te vaihawmna mai inchu tuni tiang ahin kuama a vengbit zolo ahi. Hinna humbitna ding in panlakna nasatak a um zing ah, lockdown, SOP zui ding, thianthona, damdawi (vaccine) leh a dangdang te’n do hizing maleh mualsuana/ lawtinna um thei nailo ahiziak in mihing te lungthim leh khawsak dan chuam mama ahita, siamtu a hina leh thamuanna nei pawimaw kasa mama hi.
Sodom leh gomorah gual ah gitlona a san tak luat ziak ah haltum a um di I hiu em, ahileh I Lalpa hung kit phat leh a mithiangtho te vansum chunga lak to ah um ding, khawvel vaihawm pa leh a nungzui te do na ding Armegedon hunbi nai deu chu ahi ta mai diam. Khawvel ningtin kawltin thusuak, gamsung vaihawmna inte, gam khat leh khat kimuanzawlona, du- amna, mimal chiat ah chapona leh thiltung zosia a phalam sanga siatlam manaw zing na ahin vaihawmna thupi umlo ngalchun ngaituana dang in kihenem zing thei lo ihidan uh I khawvel dinmun un a zil talo ahi. Ziakachun, Thupuan ah kitaklang Lucifer vaihawmna hun chu ahita mai diam?
Zia corona hileng ziak ahin mi zosia lungliap leh maban bing kisak na hin, mihiam hinkhua ah kinepna subei thei dinmun a ding I hitak ziak un pilna, thiamna neite leh Pathian ah hinna diktak nei te’n, mihiam khankhua maban ding hi Pathian thil hithei na tawh lampi ahun guanggal uh chu mihing hinkhua ah suachatna lampi umsun chu hi’n ka ngaitua hi.
@KL MUAN
