KINEPNA HING JESU AH By: GL Muana Neitham

KINEPNA HING JESU AH

GL Muana Neitham

Khaile, Unau i dam chiat nau maw? Tulai natna hîpi leng COVID-19 ziak ah himangthai ziang ihi sampuau maw? Hing leh dam a um nalai ah,zia simthei nalai ihiu chun kipak um ma ahin, kipak thugen in Lalpa ma kûn zing hitiu aw unau. Khawitak mun a um in, banggual sem lengle Lalpa muphakna pat chun vang i gamla lo him him ahi e maw… ei mu zing a, ei entha zing ahi. Zia bep chu hilo in, a hepina AW NEM takin, ama kiang ah chia kit ding leh ama kiang lam ah kihei kit ding in ei ko zing ahi.

Bible chang vak simkhawm hitiu aw;
Tu’lai hun umdante hi la het ziak un, ipmu lai thawhal a hun tak zet tai, ti hia’i tiu; tu’hin chu I gin lim lai sâng ua khan I hukdamnau chu a naizaw tai; zan hi a bei vâng vâng ahi tan, khua hung vâk pai ding ei tai; zia ziak chun, khawthim ah thilhite chu paitha’n vâkthuam in kithuam hitiu. Sûn ah khawsa gual ah pha tak in um hitiu; zudawn buai leh zukham ah umlo in, hûk leh kidoicha umlo in, kina’ leh kithangsia umlo in; Lalpa Jesu Khrista ah chun kithuam zawu inla, taksa utna te pitin dingin bangma bawl kiu in
ROMTE 13:11‭-‬14

“Hung un, Lalpa kiang lam ah kile’kit hitiu; ei puaitel chu ama ahiziak in, ama’n ei hi’dam ding ahi, ei vaw liam maleh ei tuam piak ding ahi
HOSEA 6:1 VAIP

Thiam zilna school te ahung kikhak a, office nasepna tam zawh ahung chawl a, kikawm tua leh zinkualna te bang ahung hithei tapua, nek leh chăk hawlna dawrte ahung kikhak a,gingtute zalen tak a kimu khawm a, Pathian Biak khawmna mun BIAKIN te bang ahung kikhak tak tak chu; gen tam sese ngailo in mi zosia aneu alian, a jawng ahau leh atek akhang taksa lam bep hilo in, lunggel ngaituana tawh thagau lam hinkhua ei sukha ma ma ahi. Micheng in buai um i sa mamau ahi. Zia natna hîpi leng hin mitin ngaituana chu a sukha ma ma ahi.

1. Bukimlona khawvel ah um, cheng leh khawsa nalai ihi dan uh ei ngaitua dawsak ahi.
Eden a gitlona ziak ah Pathian hanse lawsa leisiat a um nalai ihiu hi. Hîpi leh Natna lau um tak tak te um theina mun ahi ngal a maw..
Natna leh lungkhamna um taklona mun, khut a saklo kumtuang in van khawpi chu hukdam chate’n i thiil zing ding uh ahi zaw e. Zia mun a chun lungdawi, i ngai cheng kim in, kipak takin Lalpa chu chawi hawi zing taitiu.

Thilsiam zosia le siatna suak ah kipat suachâtsak in um in tiu in, Pathian chate zalenna lopi tak chu chang ding ahi ngal un
ROMTE 8:21 English pau inle vak sim hitiu aw;

That the creation itself also will be set free from its slavery to corruption into the freedom of the glory of the children of God
Romans 8:21 NASB

2. Chenna/umna mun chiat a ki kulkhup hi chu nuam them hi samlo chu ahi. Leisiat mihiamte hi changkhat a khawsa thei aki hi puai. Inn sak in thang tawh ki ve tua, mun chuam chuam a nek leh chak hawl leh sepna nei aki hin. A zin kual, avak kual te aki hin, mahni umna chiat a um ding, pawt dawklo ding ti thu a um hin lunggel leh ngaituana akhawi kha mama ahi. Stay home- Stay safe hi phalo tina lam hilo in, apha pen ding a vaihawmtute thupiak chu zui ding ahi. Ngaituana um zaw chu ahileh mun chuam a um, nu leh pa leh ngaina tu ding umlona mun ah inn a kikulkhup te, cha le naute mun chuam a umte, inn an um a bangkim taksa leh thagaulam a mapui ding papen umtalo ahiloleh nu umtalo te, inn leh lo neilo inlum bel ding neilote ading in, ahak sat didan maw… Lungngai leh thafang tak ah inn a umte ading in Pauchap zing hitiu aw. Hatlo, basam leh genthei te geeldawk zing hitiu e.
Nanghaw, suapite haw, suak hilo ding ah ko la hiu a; himaleh, suak la hi’lonau chu taksa â ding ah lemchâng in mang kiu inla, hepina’n na kisep tua piak chiat zaw tau in
GALATIA 5:13

3. Thina tuak leh nasepna mansua te ngaituana ei pia ahi
Tulai Natna hîpi leng ziak ahin thina tuak tamtak a umta, zia natna ziak a thina hi hung ki belap to zel ding chu ahi. Damlo, hospital ah etkawl tampi a um zing ahi. Zia natna ziak ah nasepna chia thei talo, sepna mansua, bat pe zo talo, loan dit zo talo tibang tampitak um ding ahi. Buaina tamtak gen senlo umding ahi. Sepna mansak tik umtalo, bat leh tham, thina leh lusuunna um taklona chung van khawpi ei ngaituan’an a hung kilang vawng vawng mai ahi. Bukim tak ah Lalpa’n ei siamthak kit ding nikhua hun ding ei ngaitua sak hi.

Chun, hepina zosia Pathian, a kumtuang lopina chang ding ah Khrista ah hun kopa ngei chun, sawt lo la thok zaw phat ua leh hun tungding in, hun hi’det in, hun hi’hat ding ahi
1 PETER 5:10

4. Phung leh chang nam khat leh nam khat ki daidanna um taklo na hun ding ei ngaitua sak hi

Khawvel ahin ki daidan na, ki khenchuam na anasa ma ma ahi. Gam hausa ten gam chagate musit. Nam lian leh nam changkhang zawh deu ten nam niam te musit. Melput leh taksa vun rawng ziak a ki khenchuam na bang a uang ma ma ahi. Mi vawm, mi ngo, mi sandeu leh mi vomdeu tibang ki chuam bawlna atam ma ma ahi. Hinla a siamtu chu a kibang ahi ngal ah maw Zia natna hin khemchuam a nei pua ei maw. Hausa deu te le zia natna hin alau chuam diak puai. Pathian kochuamte kiti ve sam ah semtu PIANGTHAKLO um khak ding vang ngaingam a um puai Kochuam neitu diktak Jesu Krista ahilam henailo mawng mawng le mitamtak um ding ihiu in, hetsa sa ki hetlo sak tei tei le tam in a maw. Kochuam neitu Jesu sang ah kochuam/denominations min bia, aneitu Jesu sang a Sum nei leh thunei zawh te bia/worship a ki tam diam maw. Kochuam ki vetua theilo, midang kochuamte thugen hem a pansak phallo tite mai mai ahi i ginnau! Nang mi vawm, nang mi kang, nang chaga, nang mingol ti um talo a, pau tin leh nam tin kigual tak a Lalpa Pathian i biak khawm nading ni’u chu ngaituana’n a um sek hi.

La thak a hun sau a: “Nang, Lekhabu chu la ah, a teptênate tham ding ah ting pen chu la hi; tha inla um ah, chitin, namtin, pautin leh mipite lak ah chun, la thisan inla tandok a, Pathian kiang la tut ta’n;
THUPUAN 5:9
English pau in le aw

They were singing a new song: “You are worthy to take the scroll and to open its seals because you were killed, and at the cost of your own blood you have purchased for God persons from every tribe, language, people, and nation
Revelation 5:9 NET

5. Kawichuam iti diam ISOLATION kiti paumal hin ngaituana asu kha ma ma hi. Tulai natna veite leh vei ding a ginchak muanmawh te chu isolation ti in koichuam in a um sek un ahi. Koichuam zosia te khu kochuam hileu ut a um ma ma hi. Aziak chu hukdamchate chu Krista kochuam te ahiu hi. Dam in damlo in le Kochuamte chun Pathian ah thamuanna, mite piak guallo anei ui. Ki ngaitua tia le, zia natna kiti, aki gen minthang CORONA VIRUS khu vei in *koichuam himai ta lechun ahiloleh thi maita ding hile chun thi thamuanna lanei na em unau?

Zia natna hî leng COVID-19 ahiloleh 2nd wave a hin Pathian kochuamte chu tunung sawtlo lopina achan ding uh a ei geeldawk sak in ahi. *Thina zo ah thân khuk thim apat thokit ta JESU KRISTA zal a chun thamuang takin maban a lopina ni ding ei gewldawk sak ahi. Jesu chu thina zo inTHOKIT ta ahi!Zia thawkitna hi la ki kawppi na em unau? Hukdam lahi na diam le unau,kingaitua hitiu aw
Vak kingaitua tiam in le:

Khawvel nawpsakna te, huknate,nekguk chakguk nate, siatna te hung uang deu deu ding ahi. Thudik Bible zilsakna dik ah kipat in upa taimang, Pastor taimang, zi taimang, pasawl taimang hung tam sem sem ding ahi. Bible ngaisaklo, Pathian thu him him nelsia tak a hinkhua mang, Easy methods chiapi khanglaite lak in hung uang semsem intin, Papila, nupila te haw chun thanghuainate, angkawm nate khawksaklonau uh hung pung deu deu intin, sum mu nading, hausatna ding ahinak le tin khawvel dangka bep del ah ngawl ah ngawlpi hung tam deu deu ding ahi

Zawlnei leh zilsaktu lem, akisiam kawm hung tam deu intin, Bible a Pathian hetkhaklo leh Thagau thiangtho panglo a khawvel mite kipiak kawm thei thiamna BD kiti te, M.Th te Doctorate degrees leh Belampu ding a ki Ordained, Pathian Ordained hilo, si-al gual leh ngeichal mani gilpi va nading bep buaipi,Bible thutak tangko ngamlo leh hinpi ngamlo hung pung deu deu ding ahi

Buaina nasa tak hung tung ding ahi ziakin, zia gual him him chu lei chung siam lim ah kipat tu’tiang ah hin a um kha naipua’n, um le um kit diak talo ding ahi. Zia ni chu sukchom hilo vang leh, mihing kuama a suakcha umlo ding ahi; himaleh, têlchuamte ziakin zia ni chu sukchom hiding ahi. Ziaphat chuleh, entia, zia hin Messiah a um hi! a hem, zia son a um hi! a hem tileule taksang kiu in. Messiah lêmte leh jawlnei lêmte hung pawt intiu in, melchikna leh tepte’na thupi tak tak le hun etsak in au; hithei vang leh têlchuamte hial le thep zaw hun gua’n au
MATTHAI 24:21‭-‬24

Himaleh, mite lak ah jawlnei lêmte a hung pawt gual un, la lak unle thu diklo hilte hung intin uh, amau chun amau chawpa a puu hial chule kiheisan in, mi susiathei gindan chuamte a gûk in hun paw lut intiu in, amau chung in thakhat in manthaina tung in a. Mi tam tak in a hûkna thilteu chu chîng intiu in, amau ziakin lam dik chu gensiat hi’n a. Chuleh, sum etlâna ziakin zuau thu in hun subuai in au. Amau chu malai ah kipat a chung ua a thiamlo channau leh manthaina ding thu, a la um tasa chu kilîng diak lo in a um zing hi
2 PETER 2:1‭-‬3

Ziagual a siatna leh Pathian ngaisaklona hun ahin, Hukdam chate chun pilvang leh chingthei tak a khuasa un ahi. Khawvel a cheng nalai,leisiak hinkhua mang zing maleu le, vanlam thiil zing kawm in, khawvel mite het le muphaklo sunggil limna leh thamuanna nei in,ginna chun thazak in, zia khawvel khual zinnau chu thâkla um sa lohial in, a lêng sang to zel un, a hukdampau uh Khrista hung kitna ding ngakin chunglam a thîl zing sek tau un ahi

Aleh, Khrista hepina ah kipat chun kua’n ei khen zo ding a hem? Thokgimna’n a hem, lungkhamna’n a hem, sukgentheina’n a hem, kial in a hem, ngawnchang hi’na’n a hem, lau umna’n a hem, chemjam in a hem, ei khen zo ding ahi diam?
ROMTE 8:35

La lungthim uh lungkham ki’hen, Pathian la ging ui, keima le ei ging tau in. Ka Pa In ah umna tam tak a um hi. Chuti hiloleh, nang uh â ding ah mun siam in ka chia hi, ti ding ka hem? Chuleh, nang uh â ding ah mun ka siam leh, hung kit ing ka tin, ka kiang ah um dingin hung pui ding ka hi, ka umna nang uh le la umtheina ding un. Jesu’n a kiang in, “Keima hi lampi leh thutak leh hinna ka hi. Keima ah chia lo chu kuama Pa kiang a tung ngai puau hi. Thamuanna ka nutsia piak la hiu; keima thamuanna ngei chu ka hun piak la hiu; khawvel in a hun piak gual in ka hun pia puai. La lungthim uh lungkham ki’hen la, lau le lau diak ki’hen
JOHAN 14:1‭-‬3‭, ‬6‭, ‬27

Zia ni lopi tak chuleh natnate thinate, beidawng nate um tapuan ah. Zia hun di chu thiil in hukdamchate kitha muantua in um zing hitiu e

Zia taksa muatthei hin muatthei lona chang intin; zia taksa thithei hin thi’thei lona chang ta’n a. Tichun, zia taksa muatthei hin muatthei lona a chan ah, zia taksa thi thei hin thithei lona a chan phat leh: “Thina chu zawna’n a val zo tai”. “Aw thina, la zawna khoi ah a um tam? Aw thina, la gu chu khoi ah a um tam?” ti thu kizik hi guitung ta’n a
1 KORINTH 15:53‭-‬55

*Keima ah thamuanna la neitheina ding un, zia thute hi ka hun hil la hiu. Khawvel ah hin gim genthei thuak in lau. Himaleh, thamuang tak in um un; keima’n khawvel ka zo tai,” atia
Johan 16:33

Lalpa ‘n hun maljawl in, hun vêng hen la; Lalpa ‘n a mêlvâk hun latsak zing in, la chung ah ja’ngai hen: Lalpa ‘n la lam hun nga zing hen la, thamuanna hun pia zing ta hen
KISIMNA LEKHABU 6:24‭-‬26
…. AMEN…

☦️KHRISTA LALPE’N SEPAI☦️