*LA PUANBUK KEKLIAN IN*
A genthaw leh ngaituana mai ah kawi in chuh bangma chan a kitung lo ahi. Titakna tawh thilpha semzui ah bawzui chu phatchuamna gensen lo a um hi. Mihiam te hi khanglian zel I hi dungzui in sep leh bawl inle septhei chan chan panlak a pawimaw hi. Sepna maban chu sutzawp zel a hiding ziak in kipadam lo ah kalsuan a ngai hi. Ziakachun, sep leh bawl huaplian tak ah ahi di gual dungzui ah panlak ding ahi. Puanbuk keklet na ding ah pawimaw ding ah kangaitua te tamlo cha vak sulang ingka:
A khatna, mihiam te I hindan, I paudan, I khawsakdan, khawtang hindan, sakhua lam inle thiantho na, leh mi khawtuana nei di hi mihiam te a ding ah amasapen ah thiltup ah kawi ding ahi.
A nina, I sung ah ki etkawlna, ki puihuai dan, thiltup kisiamte hin I gam leh nam lungtup, maban kinepna a panpi ma ma ding ahi.
A thumna, khawtang lungtup hin gam bungkhat ki etkawlna leh khantona ding in kalbi hawitak a kawkmu thei in, lawtinna le a tung thei hi.
A lina, mimal leh mipi lungput huapzo tak hin khantona leh lemna a tut in malzawlna kilawm tak a chang thei bawk hi.
A ngana, mihiam hina dawl ah huapzo tak ah panla zui te’n zalenna leh muanna a changsek ui.
Siamtu’n sep leh bawl ding ah a ngaisia thupiak zui ahi chun ki muan ngamna leh lawtinna kichang ngei ding ahi. Zia chu lei Canan Vangam teplawkna, chi leh nam kikhenna um lo ah Belam hawn gual in damlai hun chawmcha hi lim leh kipak tak ah mangkhawm thei ding I hiu. Zia gual gam nuam chu mang di’n mitin ei ma mimal a ding ah hing hita lo in midang a ding ah hinkhua I hung mat thei phat uh leh bukim na khawvel ah hinkhua mang tai tiu in, zia chun siamtu chu lim leh kipak in chawihawi thei ngei ding I hiu.
@KL MUANA KHAUTE
