AÎMÎTTÊT
Aziktu: Pu Ginlalthuam Vaiphei
Lalgin Inn
Mualngat Innpi
Khualzinna Gam
# Simtute zosia la leng un damna chibai 🤝
Ei pau a, aîmittêt itiu hi, damlo te le hung dam dawk deu, changkânglo te le hung changkâng deu, thiamlo leh chinglo te le hung thiam ah hung ching deu, chagâ leh gentheite le hung nei ah hung hausa deu, tina’n vak la phawt leu hin. I nam, kochuam chuleh khua leh tui i hung changkân deu nau hih keima mûdân, thildan (observation) in hung gen tâh leng:
*1.*Sakhua lam tawh kisai in, Ebenezer ’40, Suangphû hawnna, Lingsiphâi Vângkhua’n, 15th Khuangtha/December, 1991 ni ah i la mat ua, i hotu za’umtak, Rev. Dr Kh Khaizakham in “KAPÎ LEH KAPÛ TEU IN”Sap Tangval, Rev. Walkin Robert “ALA NUNG NAWU” “GO BACK” ti’n a la sapkhum tama’leu, tuni’ah khangthak te’n, kisîk in nangma, Rev. David Horn Balger, kikhawmpi ei hung matpi ding ah la hung kalsuanna ah, Pathian minlam in, MUAKNA (WELCOME) lunggil tak’in ka hun bâwl ui, ti’ah ala muakna thû kha…. I nampi adin thil lopi tak khat in ka ngaitua ahi.
2. “NAMPI KISÎK AH PAUCHAPNA” Lalpa Pathian kêngbul ah i gitlona/sukkhialna teu thupha chawi ah kisîk ngâwi ngâwi a pauchapna tiah sakhua lam i hotuten ala guan uh kha….
Leh,
3. KHANGLAI’96-CUM-GOSPEL OLYMPIC, THUPI: _”KHANGKHÂWM AH SÊMKHÂWM DING IN” tih thupi ah mang in, Pêngjâng Vângkhua’n, 21st Vulte/Feb, 1996 ni, tha, kum ah ho leh biak (All Vaiphei denomination) tawh Zillai (NEI) in khenchuam neilo ah nam pumpi huap ah taksa leh thagau a kichawlimna (kikhawmpi) nuam tak’in a la kimang khawm hi.
Ziah kikhawmpi hi kei adin kahiat milthei lohna chuh ka tangval khang (golden age) kalah thakna ala hitak ziak’in ka hemil thei ngaitah lo ahi.
Chuleh adang tampi le kochuam leh nam in i gam leh nam adin ila bawl uh, khantouna tamtak aum hih himaleh ziahaw zosia chuh suhlang suakzou puaitin zia achung ah pathum te apat sakhua lam I hotuten nam khat kilung gual tak ah taksa lam leh thagau lam a ihung changkan/khantou thei nading ah ala sepkhawmnau, i vak nungthil in i vak sulang kik ahi.
Ziah gual ah, sa’khawlam i hotute’n ala bâwl uh kha, i nampi aîmittet (changkânna) khat a hung hi dia aw…..! ti’hih gêllo theilo; khat in kahia, ziaziak’achun hun liam tasa’h, i nam in Lalpa Pathian lung ila tuaknau khat uh le ahi khah diah aw, ti’bang ngaituana’n a hung um a hi.
Ziah tigual lunggêl pha hih kichiapi zing thei henla hileh i nam hih aîmittêt deu khamaw pua’n ah, ti’hih le i ki’nepnau chuh a hi.
Mihingte hih ei man i kihiat phaklo hial, i mimal ah, i innsung ah, i khuasung ah chuleh i namsung ah hinkhua ila mat dan teu ziaban ah pu leh pate khang ah ala sukkhialnau tihawhi Pathian mit kham ngawi ngawi ah, Pathian hansia law ki um khah thei ahi ziak’in, hun ala liam tahsate ihvak nungthil kit nahin khanlet nading aum puai tih, ngaidan nei bangle ila um khak uh igingcha, ziahaw chuh ila umtak unle Lalpa Pathian ala dawng mai uh hen.
I hunte ala liamtahsa, i khangthu/i hinkhaw mat dan bang hi velthil kik ah Pathian apat kisiam thakna/kisuk dikna ding bang, tamtak um khah thei sek ahi.
Chun, eima mimal khankhua, Innsung khankhua, khuasung khankhua leh namsung khankhua bang gual ihi nau em ?
Ziaziak achun I tuanthu (histry) bang hih Pathian hansia law khat ihih khak ding alau umtah luah ahi.
Pathian kiang ah i
kingaitâwmna chuleh Pathian tawh kichamna hin, ma’nî innsung, khua/veng , kochuam, gam leh nam a châwisâng thei in chuleh i khangtou thei ahi. Chutichun, sakhua lam i hotuteu in thilpha ding tiah lung ala gel ua, ala guanggal tâk sa’teu leh a la sep dâwhsa teu haw hih nungthil kik in zuitâk, ettawntâk, sutzawptâk chuleh taksa leh thagau ah i nampi tusang sang ah hung changkâng/khantou diak na ding in i namsung, kochuamsung leh khuasung ah i vaihawmnau in vang… mihing te hi su’khial thei, genkhial thei, bawlkhial thei ihiziak in ziahaw chuh ilak’un aumlo ahi diak puai himaleh mihiamte hi ki hethiam tuah ah kih ngaidam tuah zel’in, Lalpa kiang ah gitlo thupha chawi zing thei leu hin tusang in i khua leh tui, i nam hi khangtou/changkang mailo ding ahem ?
Pathian leh i innsung, i khua, I kochuam chuleh i nam â di’n hingkhawm zing in pangkhawm zing hitiu….! 🙏
