Ahi lasak chi ahi em? By: Kaplianlal Thangluai
Kisuk khakna beliam damkuan kheu² hun ahi ta puai, ICU lut khawlaw bep d lahi.
Thagau thiangtho hi mi zosia dinga athawn ah piak ahi, abik te tichuam a um puai
A khetzak a nuam in aluak khawm haksa ahi. Pathian thu, thilpha gen bailam ahi, a zui bo i nawngkai sek uah tithu ahi
Muda in haw mama leh chin leh la suapi, u le nau kinai pibik te bazar ah van zawk gual in khawlai in zuak kin, kuaman ahinai hung tipi lou d ahiu. La khawtzawlo chu laki chawikit ngai tho tho ahi kha.(La doilo sa chu kuaman va enla lo d ahiu)
Kochuam iki tiu in, mi zatam lai ah a bik te deu tina gual ahi. Pathian in ei kochuam te hi ki gensia, ki nial, ki thangsiat, ki muda le haw dinga ei kochuam ahi puai ti hethak hitiu.
Thep ah umpa mawna sangin a thempa puak gik zaw di ahi. Themtu, suse tu lahi tawl em?
Gingtu kiti tamna mun in, gingzo lo, ginglel a tam nuam diak hi.
Thepna ka do zo puai ti sek te hi piangthak ahiu, thepna ka zo hi tite hi thepna tuak taklo te haw ahi mai diam maw??
Lungthim thiangtak le gingcha, ginglel lo hial in pauchap sek leu hin, tu ah i buainau hawhi le umbek lo di aivei maw..
Gin um le thiangtho takin i sepnau ahin um chiat leu hin, i khosak dan uhi kibang dual² mai din ka ging chai, nang la?
Mi hausa, dinmun sang chuambik umlo kihileh Pathian thu hileh a gil, diktak ki gen ngam dai kha..
Lunggel, ngaidan, doidan ki banglo, kitauklo iti teu hi a lem ahi. Apha ki dawivek, a tui kidu chiat, ahin ka lawkpi ding bang zat a umkha diam ti ah buai zaw kihi dai ahi..
Law tinna le losapna kikal gamla lo ahi, zia gual ma chun huatna le hepina le ahi tho hi.
Mit chau in mitval a buleh a muchian in, mapui thiam chun ama dodal te a ngaisang hi.
Mi lungneu (uihik tia lung pu) chun huangsung neu cha ah um nuam asan, gam a keklian ngai puai.
Din mun asang po leh kianiam khiak thiam te insung in nuina, khawlai leng a tam in, a dinmun khel ah ki ngaisang te doorbell a aap paisek hi.
