Pencil leh Gingtu
~KL.Muana Vaiphei
Pencil chu i hiat tak sau gual in thil lim leh thu zek na ding ah poimaw pen ahi. Amangtu’n thil lopi tak tak leh thu hoi taktak a ziak dawk thei ahi.
Pencil hi amang tu’n thil poimaw tak leh thil lopi tak ziak dok maleh amangtu leh puihuai tu umlo achun bangma lo mai ahi. Gingtute hile Pathian khut in ei pui lo ah ei mat lo ahi chun bangma lo mai ahi.
Pencil hi thil i zek laklaw lai inle i zum hiam zel angai sek hi neu cha cha ala tum sek ziak in, I zum hiam thak kit zaw phat leh chu ahung hiam mama kit sek hi. Gingtu Pathian nasem tute hile i sep laklaw lai inle natna te, lungngainate, haksatnate, buaina te I tuak sek ahi, maleh, pencil I zum hiam thak zaw ah ahiam kit gual in gingtute hile haksatnate, natnate, lungngainate leh buaina te hin thok hatna leh piting i hi thei na ding ah ei siam pha tu ahi.
Pencil ah thil I zek ahin i zek khialnate chu a noi mangna mangcha’n i nuai mang in I ziak dik kit thei ahi. Gingtute hinle thil i hi khial ahem I hi diklo ahem chu suk dik ah siam thak kit chu thil diklo ahi pua, zia chun dikna lampi’n ei puihuai zaw sek ahi.
Pencil hi a polam et in chu thing mai mai ahia asunggil ah um Graphite hi a poimaw pen leh a phachuam pen chu ahi, gingtute hile polam kilat ah hoi na mai hawl hi a pha chuam pua, sungngil lam ah hoina hi apoimaw pen leh apha chuam pen chu ahi. I Pathian uh hi sunggil lamah dikna/takna dawi ahi Pathian angal a (sam no. 51:6).zia ziak chun bang tik lai inle sunggil lam ah i hinna hi i ki et chian sek ding uh ahi.
Pencil mang ah thil i zek hin sulnung nutsia anei tei tei a, gingtute hinle khawvel ah i thil hi ta phot ahin sulnung nutsia anei chiat hi time het zing ah i thil hi te hin bang sulnung nutsia nei ding ahem ti ngaitua ah i thil hi teu hi pilvang tak in I hi ding ahi.
I damlai ah i hindan zosia hi thuanthu i zek chu ahia, a zekna pencil chu eima chiat hi i hiu a. Zia pencil chu bang i zek sak diam uh ki ngaitua chiat hitiu.
