PATHIAN MIZIA MIHING A HUNG KILANG DI AHI
– KL Muana Vaiphei
Vanchung sang tak ah um ni leh tha, aksi leh thilsiam zosia hin mihing leh Siamtu lopi dan leh a lungtup a sulang in, a zem hawi ma ma in, a etlawm takzet hi. Zia lopina leh hawi dan chu a hedawk zo puau a, ngaidan leh pawmdan chuam chuam a nei ui. Himaleh, Pathian lopina chu mihing pilna’n mudawk zo puan tin, Ama- Pathian hepina khawvel leh mihiamte chung ah hung kilang apat hin mudaw leh hiatthiam thei bep ahi.
Pathian chapa hial khawvel ah Pathian kumtuang lemguat kilang zolo chu mihingte lak ah ama ngei in ahung sulang a, calvary cross tiang a khawvel thiamlona a hun sawp thian tiang inle a hia thei nuam nailo a sing a sang in thimlai in a khawsa nalai ui. Zia zo zaite kianga chanchinpha hil ding in mawpuakna liantak ei pia ta ahi.
Pathian chapa khawvel ah ahung a, Ama lemguat leh I dam bukimna ahun gen tiang inle a taksang nuamlo a tam nalai hi. Lalpa grape huan ah thagau mangthai hawl dawk ding ah sawl a um gingtu te’n Khrista hindan dik tak leh zui dite zui in, thianthona tawh Lalpa apat hepina tawh Lalgamna sem leu hin khawvel a hin buaina, lungngaina um puan tin, I lennau khawvel hi ngunkhamtual nuam chu chang mai di ahi.
Zia a chung ah Pathian thil hawi tak tak leh etlawm te’n khawvel a chawi hawi ma ma gual in, leisiat ah Pathian thilsiamte leh mihingte ki hepina in ki chingtup thei leu hin khawvel ahin lamdanna leh lemna um ngei di ahi.
Khaile, vanchung ah thilsiam zo zai hawi tak takte taw leisiat ah thilsiam zosiate limtak in Patthian chawihawi chiat leu hin chu khawvel ah buaina him um puan a. Lopina leh hepina hi aki zemtua leh aki chawitua ahiziak in thilsiam zosia leh siamtu hi hun tin in kipawl in, hepina leh lungmuanna chu thupi gual in kumkhua’n kang talo in luan dip dip tan tin, hepina leh limna khawvel ah hung ngei di ahi. Zia hun chu ngak in thilsiam zosia’n Lalpa vaihawmnna chu I ngak ngut ngut uh ahi. Lalpa Lagam hung tung ta hen. Amen.
