MIPI PALAI KITELNA KEI MUDAN
-KL Muana Vaiphei
Hun chiatasa 1998- 2017 hill districts- Outer Manipur sung ah MDC/ MLA/ MP election la contest ding leh la insung, tribe, community leh a dangdang te siam tup masa’n tithu a hung ging masape’n sek hi. Zia kammal hi mimal kihikhauna, kilepna ahiloleh election jangtak ah kigawl nawp lo man, ngaidan lakna leh sagu setuana dan in kamu ahi.
Abang chu hitaleh, government ahiloleh mipi representative ( palai) nei gam leh nam a ding ah thilphachuam semdawk thei ding ah palai kisawl ding hi mimal insung kihawlna leh puitu hina lakna ding, thuneina ding te hizaw lo in, mipi leh candidate te’n a lungtup uh a lawtin theina ding insung mi hilo te’n huai lut tam dan thiam ding ti ahi. Gam leh nam khantona ding in insung ahiloleh nam sung mi chu vote hawl ngailo ah a vote disa kawi di chuleh eile a vote disa um di ahi.
Mipi representative (palai) nei gua I hi ziak un lungthim huap zo tak leh maban khankhua gelchian kawm ah kalchawi di I hiziak un, pau- le- ham, nek- le- dawn eima nicheng thilbawl, midang in a pawm theilo te kisum hamham ngai ahi. Zia taksa thianthona hi mimal a ding bep ahipua, mi taksan leh muan theina ding in kiginchakna lampi a um hi. Zia chu ngai pawimaw ah puitu hinkhua thei dandan ah kisuk thiantho ding ahi.
Tumasang gual ah mipi palai di te sum- le- pai ahem, inkuan kituaklo na ahem, pau- le- ham leh a dangdang kituaklo na te nusia ah gam leh nam khawsuakna lungput paw vilvel ah palai I teldaw lo chun, I tanggam zosia hi nam hausa leh lianzaw te khut ah tummang ziang ding dinmun in I ding ta’u ahi. Tuhin I suachat theina um sun chu Land Rights tawh kisai ah I bitna ding un Sixth scheduled ah kizik ADC provisions I nei theina ding ua takchapa- takchanu tihun ahitai. Chutichun, I palai sawl di te’u lemgel thiamna leh pilna tawh chung ah Pathian chun a chate Ama gingtute nam liangvai tak ah um nalai ding ah ei dawi ta lo ahiziak in I pilna’u leh hatna zosia tawh nang leh kei ti um ta lo in mabang semkhawm leu hin gamtiam gam chu tung ngei di I hiu.
India government in tribe recognition chiapi in mani nam a ding ah ang masialna ziak ah kituaklo na tamtak um te kituakna ding ah sukphat ding a um hi. Chun, centre leh state apat development fund mipite a ding ah um te haw hawpgual ahithei na ding in I vote uh mantam tak thanuam tak ah khiak teitei ding ahi.
Zia hun phat chuleh I gam chu Israel gam gual in hing dipdep ta’n tin, I upate’u leh khangthak te ngei inle zia pakzu chu chawp ta’nau. Nek leh chak khamthei sal ah tang ta pua’n tin uh, I chenna gam hi khuaizu leh sana tui luanna mun hung hi ta’n a. Siamtu Lalpa Pathian lunglam leh dawidan siam in nunnuam in leng khawm dial dial tai tiu.
