KIGENSIAT MAI SANGIN KIPAKCHATNA HIN LUKHAWNG A NEI ZAW DIAM.
_K. L. Muana Vaiphei_
Khawvel ah leng leh khawsa mihing te chiadan phung ah *KIPAKCHAT* sang in *KIGENSIAT* hin, thûk tak ah pan lianzaw chang ta dan in a um tai. zia hi kimuanna leh khantona lampi a dâl nasa mama in, malzawlna him him hung luanglut ta lo gual in a lang ta’hial hi.
Mihing pianphung ah zapi lunggil munlua pen a hung hi’tak ziak in sakhua puitu leh socio – political te Lulna leh za um na’n kiak lam a nawt ta mama in ka hia, Sakhua puitute hi kochuam te mang ah thagau lam chawmtu ding ah a tel leh a nam det chu ahi ngei ui. Zia gual bawk chun socio – political leader te hi le mipi’n a tel tampi aum tho ui. Chuti chu ahi tak ziak in a vision uh le Pathian in a mawpuak na’u a piak teu a sepdaw guat uhi zui ham pha hilo ahem ti chang ka nei sek hi.
Mipi leh Pathian in a puitu dingah a tel dawh a lêm leh a tak chu hung um gel gel ding ahi nau, a hina dik tak nei leh nei lo chu hiat khen thei ahi ngei chu ka tak sang hi.
Malai ah sakhua hotu masate ziak in gamtiam gam tung le I um ngei ding uh ginchat aum hi. Zia hunlai khan le nialkal tu leh Zawlnei lêm tamtak te le aum sek vang un, lawtinna tak tak a tun ngai puau in lungzinna leh beidawnna khuk in (suak leh sal in) apui lut sek ui. Ahi’nla, kona chang te’n Lalpa mapuina zal haksatna tamtak tawh Pathian lemguat chu a sem buting sek ui.
Zia gual ah Nam piting masa te’n gam khat ah nei theina ding un, Nampi khang leh khrista chanchinpha, Ama thagau thiangtho puina zal chun mulawkna kichiantak tawh mipi pui in kal a chawi sek ui.
Thagau thu hita henla, taksa thu hitaleh, Puitute mulawkna Pathian a pat a mute’u seppi in i thei dan chiat un zathuap ah panpi in pauchappi leu hing, kalchawina hung zangkhai ngei intin, Kochuam khawtang leh gam leh nam puitu te ngawngkawl hi putpi leu hing lawtin na’n hun zui ngei ding in ka kinem hi.
Puitute hi mipi leh Pathian tel a hi’gual ma un, kawng bang kimah hepina leh dawisakna thutak mawp leh pauchap piak in a gikpuak te’u khuam bang dopi leu hing malzawl na’n hun zui ngei ding ahi. (Lawtinna kawlni hung suak ngei ding ahi).
Khaile! Nu leh Pa, U leh Naute, Lalpa ah chun kitulut in, khiangkho ah pauchap zing kawm in, Pathian leh i nam puitu te gensiat leh muanmawna chu liptha’n, i hatna leh theina zosia mang hitiu. Gensiatna sang in khat leh khat KIPAKCHATNA hi lawtinna leh gualzawna ahi gualma in, ziagual nasep zathuapna chun Lukhawng a nei hi.
_”Lalpa ka mite tawh kal suankhawm thei zing ding in pilna leh vaihawm thiamna ei pe mai ta’n”_ Praise the Lord Amen.
