*KI PANPITUA NA LO IN KI VENGBIT ZO PUAI TIU*
Tulai khawvel pumpi’n a tuak tak leh maban ah I tuak to di’u buai um mama Hileng Corona Virus apat kivenbit na ding a government in mimal leh khawtang zui di dan a siam uhi a chiazel lai ah, ka ngaituana hung kilang chu corona virus vei tate leh a vei nalai te sang in a symptom nei nailo leh bang dinmun ah health condition um ahem hiatlo pi, SOP zuilo ah kipawlkhawp leh mawk tuallen mai te hi lau um tak hiding ah mipi ngaidan tamtak um in ka hiai.
Mithi galna SOP zui hi aphai. Mithigal na mun khenkhat ah SOP zui lo leh covid- positive ahiu ti Doctor te’n a thi inkuan te positive hilo ahi ti ah, tawmngai suatu volunteer leh tuanvai te lau sasa panmun hung late leh doctor te muda, awimaw leh ngaithiam lo I um kha thei sek ui. Zia hi thil nuam lo leh thatda um tak ahiziak in ei sang ah hezaw doctor te thugen pawmmai hi a dik pen ah ngaithei mai leu hin nuam chuam mama di ahi.
A tekhin thu in, corona virus vei, a symptom nei te chu hospital leh home isolation in aki enkawl un, amau le kihechian chuleh mimal tin te’n kihe ahiziak in amau apat kiven chu thil haksa lawmlawm ahi puai. Amabo, a vei hingal ki hechian nailo te apat kiven dan di hi thil bailam lo hial hidi’n ka ngaitua hi.
Zia gual dinmun a ding I hizing lai un, mihiam te hi kingaina, nek leh chak kihawl kawm, kipawl leh nekkhawm chiakhawm I hiziak un a chang leh lungzin um mama didan ahi. Kipakni leh dani ah khawsa khawm leh kipanpi mi leh namte ihi ziak un kiven theina ding ah lampi tamtak um te ahin mimal tin te’n Pathian apat pilna leh lemhiat na mangthei chiat ding in lunggel thak leh panlak thak hi ngai mama ding dan ahi.
Hun chiasa leh a tung zing thuthang te I et in Corona ziak ah mihiam te damtheina sia mama ta ahi ziak in, mihiam kingainat zawk sem na ding, Pathian lopi na dinga dan leh kumtuang lemguat sep bukim zawk sem na ding ah damlai hun chawmcha nei I hiu a, I mawpuakna’u I sepdaw theina ding un mihiam tisa (emotional or physical gathering) tamtak te nusia in I khualzin lampi ah I sep di te’u I sep theina ding un chingthei tak ah kalsuan hi lunglut a um mama tai.
Zia corona virus tilo virus dang tamtak a um hi. Pathian in mihiam te pilna a piak khawvel pumpi a hun hun ah kihiattua theina phone mangcha kihiattua thei ahi ta, a pawimaw zosia kibawl thei ahitai. Chutichu ahitak nung in zia pilna chu mang in thil tamzaw te hi bawl thei ahi tai. Amabo, alo theilo a um chun government guidelines zui ah kitimattua ah ki mutua leh sepkhawp thei ahi.
Mihiam I hina dawl ah kipunkhawp, nek leh chak hawlna te taisan thei gual ahi nailo ziak in hepina dai thei mai lo chu tawh kukalna, tawmngaina leh pilna Bible tawh kituak hi nusia mai lo in kukal leh sekdo tak Pathian lemguat thiltup te hezing kawm in kalsuan hitiu.
Khaile, unaute nek leh chak hawlna leh chanchinpha genna hin I mawpuakna’u gin umna leh titakna tawh Pathian lunglam hawl kawm in, I taksa’u leh thagau damna ding in lampi guanggalna bawl leu hin tu leh tu ah I saltang na’u apat hin suakcha ngei ding in Lalpa’n ei panpi ngei ding ahi.
Iki panpitua ah guideline kisiam te phatak ah I zui lo chun, I leng un zia hileng ahin ei chumbuai thei ahiziak in, SOP diktak ah zui chiat leu hin lawting ngei di ihiu.
*@KL MUANA VAIPHEI*
