RIP Pu SN Thanga (The Legend Singer) SULNUNGTE KOUKIK THEI HILE maw
✍️ LC Neihsial
Zia khawvel buaina khellam ah pialgal mun ei zawtsan tama le chun, la sulnung hi khawvel ahin bei talou ding ahi. Mi zosia in aneilo la aw gihoitak mai mangcha ah la zaila awi te hin chulni neidiak puan tin. La taksa buanlei changta maleh la awgit hin lamite thinlai su hing thakthak ding ahi hila maw.. Nisa eitum khum ah thim in azui gualmai in lamite la aw ngainuam mama te hin tuni hin vang chu thimziing kalam tua uh ahipen mai hi. Chialo theilo la lahi tapua, pialgal ah kimutua kik ding in thamuang tak in ala chawldam maitan aw..
Zingkal whatsapp group ah thakhat a messge hunglut chu kavak en ngal ah, ala khuti mai dan lahitai maw..? Khawvaiphei whatsap group achun RIP kitiangsuk dandan maleh la chanchin zikmawi ka ut ua, ahinlah kisit mama in ka um ua. Madam Betty Vaiphei in comment na ah, ka min ahung mentioned kha, ziachun ei motivated in bawlthei dandan in ka pen kala dawk mai ahi zawi.
Pu SN Thanga la chung in bawlthei bangma kanei puai. Zia anuai a te hi nang geldaw nan lungthim sunggil tak akipat in lala te aban ban chan kavak ngai ahi.
Damlai khawvel ahin.
Mitin hinkhua matdan a dang lungzinna siatlei ahin zia khawvel ah mi zosia kibatlo dan, hinkhua lampi chuamchiat kihaw ah, gentheina, kipakna um maleh khawvel abukimlo dan ataklang hi.
Kimkhat te dia limna nite, kimkhat te dia kana khawvel ah bangma permanent umlo ahidan agenchian ah, mihing kipakna hi midangte suliamtu hithei ahidan leh, khawvel khanchan chiadan kichian takin ahilchian zou hi.
Ami dawisakna Chang la um, Amin bangma simlo latam khawvel abawlthei te a ding a nop mama, agenthei te a dingah zia khawvel hi thakla taak ahilo dan agen hi. Lungthim chinchai neilo la kitam, lung tak mama thilpha he ziang lele lungheilo latam atina hin tulai kochuam, insung leh khotang ah politics chiadan ngaikhawk mama ahidan akilang hi. Society a ding ah natna hik hi subei ut na duthusam in zailan a awi hial ahi. Ziahaw kal a chun, lunggai mama le kitam, lungkhamna neikeilo khangthak ngawl tat mama nalai kitam mama hin I society ah ziagual thilte hi pona mama ahidan ahiatthei hi.
Suihlung aleng ngei
Suihlung aleng ngei kahan thil Chang in, ka chun ke zua le theisen neulai a lung kituak a len a, thimthu lenkhawm lai, mitthan alang zing e, kalunglai gil a
Zia khawvel insung haksatak a ala seilian, aneu a anu’n ala beisan, nau chaga ah ala khosa anaute ala enkawl seilian hitei ding ahi. Lunghelna, gentheina tamtak tawh hung seilian milunggel mama lunghel mi chu ala hididan ahi maw..
Bawite papa lung thim haksat bannan, kithu mangtua in muan bawi, siam felbawi.. la u liangthei kei naubang nui intin, suihlung ngaihlai kabang kahung muphat bawite banggual ah haksatna atuaklai ahle enkawltu hina mawpuakna nei ah nasatak a panla sek ahidan akilang ah, anau te kituaktak ah ahung seilet ua ahung pitit di u chu ngakla mama ahi. Ziatak chule ama ngei le lungmuang ah kipak ding ahidan agen hi lungkhoi umdiak chu ahi.
Ngaisiat in ngai lou in kahun zilgai na te ti ah avak awi diatdiat cha hin dawisakna liantak nei mi ahidan akichian mama hi. Pa mawpuakna lungthim piting tak nei ah insung enkawl tu ahi.
Malai thimthu
Malai Thimthu Malai ithimthu cheng velthil changin , albang kavai ngei siatlei gam ahin. Thildang bangma dang aneipua lungsiatna liantak anei vangchu akichian ahi.
Milungsiat theitak mi ala hi ahi. Lungsiat na tilo suanding bangma neilo ati hin akingai niamna asulang ah, vannuai mithiam tenle a sut zawlou uh lungsiatna hethiam tukhat ahi akilang ahi.
Lenna tang te dangin
Lenna tangte dang maleh ginum ding tihin, tulai nungak tangval hinkhua bep hilo ah, nupan kikal, nu le pa, suapi kikal a ginumna hi a poimaw mama dan amu thei ah.
Hinkhua a lungzin hunlai ahle midang khat chu salvaktu ahisek hi. Ziagual ah mi lungzing te panpitu leh salvaktu hichu amantam dan ageldaw thei ahi.
Lenna tangte adangta, mual le tang in eihal tai. Keiuh khawvel in kaum nalai ua, nangchu pialgal la zuantai maw.. umna mun le heina mun a ginum in, ginum zing in😭🙏
Good bye the Legend___😭
