KHAWVEL MIHIAM TE NEK LEH CHAK KISANNA LAMDANG
– K L Muana Vaiphei
Khang kisut dan leh kum kisut dan in naupang cha himaleng khangthak zaw deu te leh khang ah hung piang zel te a ding ngaituana zal in nek leh chak lam khang hung kisan kindan neukhat ka gen nuam hi.
Zia a chung ah thupi pani hung kisang lamdang hi a pha puai katina hi ziang lo in, khawvel kiheidan leh kisan lamdanna a kingang dan ka gen ut na ahi. Zia khawvel limtak ah kisang lamdang hi maitua leh pawmthiamna lungthim I nei theilo chun, khawvel politics leh sakhua kalsuanna hinle buaina namen lo hung tuak pai ding in ginchatna ka nei hi. Zia gual hun buai um thuthung lui leh thuthung thak hun kisangna’h kuama kithulak lo hun ahung tunkhak tak inle, hun buaihun chu paltheng zo ding ah kisakzawna nei a pha diam ti ngaidan leh mulawkna nei a pha diam ti ngaidan kanei hi.
Kum sawmthum vel liamta tuam tiang a khan sa leh nga a kimat leh tha ni chuleh gamsa a lian a neu kitha leh nekkhawm ni hun in, etsaknana’n, athin alung, achek, angawng ahiloleh alu tite hi naupang nek thianglo leh phal ahi ngai puai. Ahi’n, bangtik ah zia chu kisang ahem ti hiat manlo in a kum naupang zaw te’n saphe leh sagu sang in sasung, athin alung, ala leh a dangdang nidang ah naupang te nek thianglo kikawi tekha tulai upa te sang in naupang te’n a du zaw tau.
Chun, malai deu khanglui te kha thingtang ak, vawk, khuaino, ballung, beling, sazu, vacha leh gamsa himhim a du chuam bik ui. Ahinla, tulai khang te’n Kelsa, Belamsa, Uisa, Broiler aksa leh Salem mai mai leh mimi, waiwai , sauge leh a dangdang tivel a du un a ngaisang mama tau hi. Ei a khanglui deu te dudan leh huan dan himhim a du ta pua’u a, insung an nekkhawp leh nunnawp mat le ahung buai um thim ziang ta ahi.
Zia a chung ah nek leh chak dudan leh chawndan kibang lo tak ah khawsa leh vaihawm I hiziak un, nek leh dawn bep hilo in politics a ki puak dan leh kisawng bawl dan leptuak thak di hung tam mama di ahi tai. Zia gual khawvel kisang lumlet khantona kinawtak ah delphak lo khawp ah hung um hi, ngaituana nasa zawsem ah piak ding, tulai dinmun tawh kituak ah (adjustment) nasatak ah tha leh zung piak ngai ta maithei ahi.
————————————–
GetinLamka Cabs Services available 24×7
