KA THUAKBU A NEU NGEI
KL Muana Khaute
Mihing pangai in ka Nu Gilpi’n ka hung kizil in, kilawm tak ah khawvel melvak hawitak nei in ka hung piang in, chung leh nuai ah thilsiam zojai pha leh hawite ka mu’n, lopi ka sa ma ma mai hi. Chutichun, ama’u tawh hinkhua lim tak ah matkhawm dan di ka hun ngaitua zing lai in, a chang leh kâ-na leh limna’n hun ka mang sek hi.
Mihiam hi bang dingah siam ka hi em!hiti lawm lawm ah nawpchenna ding leh khawvel cheimawitu ding siam tu’n ei Guanggal piak mai hi ka ti sek hi. Amabo, du-amna leh thangsiatna, mit ah mutnawp leh thuthang thil pha leh phalo khen dan thiam lo ka hi mai sek hi ka ti sek hi. A chang leh bukim lo ah siam ka hia ahi ti di mawng ka hi ka ti sek a, Pathian in ei piak ka hinna hu, Ama Pathian in ei piak umzing ahi lam ka hemil sek hi.
Pathian ei thil thawnpiak ka hinna sia leh pha hiat khenna te hi, ei tuamtu leisiat ei siamna leh ka nek ka dawn sek te hin ei thunun ahi lam ka hemil sek a, sual chu ka la bawl kha sek ahi. Kisik chang nei in a guk in ka lungthim a kap ngawi ngai sek hi.
Zia ka THUAKBU hi a neu a, a chang leh kei le kikhualchil man lo in midang te hemlam thimthu’n ka la nem sek a, ahi’n, keima ahin kipakna leh limna him him a um thei diak puai. Zia khawvel ah thil tung zosia hi bang ti’n thit thiang in lungawina ka mu ta diam ti hi ka pauchapna a la hi sek hi.
Khawvel ah thil tung ta te leh ahung tung zel ding te, Pathian lemguat ahi ti hedawk lo a dam hun chawmcha’ Pa thununna ka thawk lai in lungngai mitthi’n ei chum’ ti la kha he dawk in i chung ah kipakna leh Daa na hung tung tapo chu Lalpa’n ahe nai ti ah, I lungthim THUAKBU, I hinna Pathian piak, sia leh pha hiatna kumtuang ah hing zing ding hin, eima mimal chung in vai hun hawm ta leh Khawvel ahin lemna hawl ngai ta puan tin, lim in mi zosia hin Pathian pak in chawihawi thei tai tiu. Zia khawvel hi Jerusalem thak hung hi tan tin, Sakeibaknei leh Belam te chun laitual leng khawm tan nau.
Zia khawvel ah thil tung leh a hung tung kit di te hi, nisin ah ngaitua in ka buai thei mama mai a, zia hi kei a ding leh ka mihing chanpi te a ding ah phatchuamna tut sang in lungzinna tut tu ka hi mai zawi. Ka thil mu leh ka hiat te hin ka ngaituana thuak neucha hi subuaitu ahung hi sek a, malam kalchawina tamtak ei khak piak tu leh lungzinna mai ahi sek hi.
Zia khawvel ah thuneina leh Lalna te, khat leh khat kimuda nate, tual leh gal te, natna hileng leh lungkhamna him um tapuan tin, nuam in thilsiam zosia lengkhawm dial dial tai tiu…
