KÂ NUI PUITU HINKHUA MAT DAN:
By: K. L. Muana Khaute
Mipi vantâng mu leh hiat dan ah chun, lawi upa te him him hi sum leh pâi, insung khawsakna nuam leh nei dingah ginchatna a la um sek hi. Zia ngaidan chu hesa i hi ziak un lunglel leh pilvang tak ah muchianna chiimtak tawh kalsuante ihiu. Thutak tawh kalsuan chiat leu hin, ngaidan lui te kha chindan thak tawh kalsuanpi in I Gam leh Nam masawnna hung hi ngei di ahi.
Mihiam te hinkhua mat dan leh chia dan tampi a um in, ziate lak ah chun, mihausa lawi upa leh migenthei lawi upa chanchin leh dinmun a um gel gel hi. mikhenkhat te chu lawi upa ahi phawt ua leh sum leh pai ah kiningting dingah ngai ahiu in, Amau chun insung, khawtang leh pawlpi a ding ah napha a sep nawp phawt ua leh phatchuamna ding hun tiang a sem thei ui ti hi ahi. Ziachun masawnna a um thei hi.
Ahi’nla, lawi upa khenkhat kiphal leh ki pezo mama leh tawmngai leh fel a um thei sek tho ui. Alawi te gual un, nei lo sa sa’n khawtang machalna ding in bat leh tham pum in nampi khantona ding ti’n theitawp sua in a sem ham ham ui. a sepna loma chu a lawting ma ma, ga tamtak le a luak sek ui. Amabo, a insung ah a neisun sun seng ah nampi na a sep lai un, Insung lam hinkhua ah taksapna a hung tam phat leh Zi mitluan leh upa mitluan chu tuak pan ahi mai sek hi. zia bep chu hilo in, Nampi nasepna ding ah mi sum leh pai i thung lâk ahun tak ah i dit thei lo phat leh ahun sik ua, ziatak chuleh insung mite leh eima ngei a di’n zachat na’n a ki dim sek hi. zia hun tak chuleh khenkhat in ei eu lau nalai sek uh ahi. zia chu ahi nampi nasepna, I cross put chikhat chu ahi.
Zia bep chu hilo, mipi tamtak te’n le lawi upate ginmawna, a diak ah sum leh pai hau dingah ginchatna hi a lian talaw deu a, zia sang ah chun kitawsawt leh lamdik kihilna’n kimang zaw sek henla, kimuan mawna umlo deu in nam nasem leu hin, thanawpna leh lawtinna pha zaw diak um ngei ding in ginchatna ka nei lian zawi. Sawm giakkhawm khat in zun a che leh a leng ua zun che dan ah a ki
ngaina pen hi, I mawlnau leh khanto thei lo na’u bulpi hi in ka ngaitua hi. Khawvel le apha tawh a phalo tawh khawsa khawm i hi ziak un, khen dan thiam leu hing semtu te din le thathaw a um deu diam ka ti ahi.
A bangchu hitaleh, Khawvel ah khawsa leh khualzin mai ihiu a, thilpha hi ah lawtin i nawp tak tak chun, Ngawngkawl bat khawm lo thei lo i hi nâklai ziak un, thilthiang leh gapha sualo di taphawt pumpel in, Pathian pilna tawh mipi lawng i tawl na’u hin, ginum leh kukal tak in pang leu hing, buaina Tuisuagiat ah tumpi lo in kilap sânpi zel mai ding ihiu. zia chu “Kâ nui hinkhua” pellam ah hinkhua mang ding ihi tau tina a himai hi.
