PATHIAN NA HUN KHAWP SEP HIN KUMTAM DAMA SEP LO SANG IN LUKHAWG A NEI ZAW MAI DIAM :-
– K L Muana Vaiphei
Zia Pathian thil thawnpiak te lak a mihiam chan pi te a dinga thil phachuam bawl ding a guat leh siam ihi zing lai un, thipha bawl sang in thil phalo bawl hi a tam zaw mai diam ti chang a um hi. Zia te chu I khawvel chiadan, nasepna, khuasakdan leh ki vaihawm dan teu a pat muthei tampi aum hi. Bawllo ding a thupiak phawt hi bawl ding thupiak gual mihiam te hin bawl ham ding in I mihiam lui uhin bawl ham guan ei thunun ah, bawl ding a thupiak sang in bawlo ding a thupiak hi I bawl ham sek ui. Ziaziak tak achun ichen na khawvel nuam tual a ilenna diu hi thalek gam leh Sodom khopi gitlou na thanghuai gual in gitlou nan adim zouta ahi.
Pathian in ami hiam siam te hi talent chuam chiat a piak chu hi ngei ding ahia, i sakmel le aki bang puan, i kawhei dan, i nek hawl dan, i thiam dan leh thiam dan chichuam ei pia chiat hi. Zia Pathian thil thawn piak ama ngei leh a mihiam chanpi te a ding a phachuam tam leh siat thei na tut thei gitlo na lam thiam le a um hi.
Mihiam dam kum hi ahun ahun in a hung ki sang sek, malai mimaste kha kum 800/900 lam val a dam sek un chun Khang a hung ki sang kit a mihiam kum 150 vel ahia,a tawp na lam a chun kum 80 tuam vel ding in Pathian in ei bithiak kit tai. Tulai hun vang in kumtam ziang le um thei ta lou in seol (thina thanko tang) lam I zuan zing ziang tau ahi.
Tulai khangthak te khenkhat in scientist leh doctor te mang in KUMTAM tak dam gua le I um thou ui. Mihiam dam sawt hi I Bible in a chawihawina tam tak a um zing lai a kum tamtak dam a siamtu lemguat semlou a kum tam tak dam hin lulna leh phatchuam na tam in ka he bek puai .KUMTAM tak dam Lalpa leh a mipi na tam tak sep dawh chu kipakpi um ma ma ahi zing lai thilpha chuam bangma sem lo hi kum tampi dam sang in Pathian leh mihiam lunglam leh pawmtak neucha bek sep hin Lalpa leh mihiam te ang achun phachuam tak leh lul tak hingei ding in gingchakna lianpi ka nei hi.
