27th August 2022 | Kanam Vaiphei
Education Minister in Kangvai Hr. Sec. School ah Class XI hawng.
CCpur, Aug. 23 (Nisin Thuhiltu): Kangvai Higher Secondary School (KHSS) complex, Kangvai, CCpur ah tuni 23 August 2022 zingkallam dak 11:00 in Kangvai Higher Secondary School (KHSS) leh Zillai Kangvai Block organise bawlna Kangvai Higher Secondary School (KHSS) ah Class XI sim theina ding in a hawndawna leh Felicitation Program a um hi.
Zia hun chu Manipur Education Minister, Thounaojam Basanta Singh; Letzamang Haokip, MLA Henglep AC, L. Nandakumar Singh, Director of Education (s), Manipur; Alfred Jamlallun Khaute, MCS, Addl. Director of Education (S/Hills), Manipur leh N. Chingkhei Singh, MES, ZEO Churachandpur te’n Chief Guest, Functional President, Guest of Honour leh Special Guest hina tawh a uap ui.
Chun, Council of Higher Secondary Education Manipur apat official, Zillai GHQ leh Kangvai Block lawiupa, Executive Member, Vaiphei People Council VPC GHQ, Kangvai ki’m leh kiang ah khua hausa, ZEO CCpur Staff, Star Education te’n le a uap ui.
S. Ngulzaching Ngaihte, Principal i/c, Kangvai Govt Higher secondary school in vaidawn thugenna leh presentation hun a mang a, Chief Guest in Kangvai Govt Higher secondary school ah Class XI hawndawna a nei hi. Pauneihlal Haulai, President, Zillai GHQ in keynote address a bawl a, Kangvai Higher Secondary School (KHSS) apat Elvis leh Sanga banah Zillai Kangvai Block mapuina’n student exam ah lawtinna nei chungchuang diakte kipakpina a um hi. Sanamani Meitei apat Special item suklatna banah guest te apat thugenna um in, YVA Kangvai Unit apat sangsang bokbok lam suklatna a um a, M. Suresh Kumar in kipakthu genna tawh hun matna a khak hi.
Tukum 2022 in Kangvai Higher Secondary School (KHSS) apat Class X 1st Division ah zo student 9 a um ua, 9 te’n 2nd Division ah zo in, compartment mu student 9 a um ui. Zillai Kangvai Block nuai ah Class 10 leh 12 zo thak student 60 a um ui. Kangvai Higher Secondary School (KHSS) chu “lighted to lighten” ti thu mang ah Class I- X tiang sim theina ding ah 1964 ah phudaw in a um a, 2015 a khah Class XII tiang sim theina ding ah dawpsan (upgrade) bawl himaleh student um mumallo ziak ah a sangzaw simtheina ding ah siam ala hilo ahi. Tu dinmun in lecturer 8, utilize 9 leh staff 13 etkawlna nuai in student 214 a um a, next academic session ah Class XI sim ding ah admission bawl student 2 a um ui.
Chief Guest Education Minister, Thounaojam Basanta Singh in a thugenna a chun, Education Minister himaleh program /function mawk uaplo, minister ahi apat gamsung ah thiam zilna lam dawpsangna ding ah policy leh adangdang bawl a office mun ah hun tamzaw mang mi ahidan a gen hi. Manipur in tanggam leh phaizang, chi leh nam khenchuam neilo chief minister i neihkhak uh vangphat um ahidan gen in, Chief Minister in gamsung khantona dng ah thiam zilna lam ngaikhawk leh thupi bawl mama ahidan a gen hi.
Education Dept. nuai ah student-te phatchuampi ding mission/program thil thil chuamchuam patdaw ah um, maban ah le thil thak tamtak patdaw hinalai ding in a gen hi. Kangvai Higher Secondary School (KHSS) puaphatna ding tawh kisai ah Zillai GHQ in dawtna lekha a piak uh chu ama’n le ngai poimaw ahidan gen in, school van matchak tawh kisai ah a tasam umte chu ama hithei tiang ah a sukbukkimna ding ah panla ding, naupangte a ding ah a recreational facility pia ding hi’n a gen hi. Gamsung ah thiam zilna lam dawpsanna ding ah khua chuamchuam 20 vel gawpkhawm a, amau a ding a chu mun khat ah residential school leh staff quarter umtheina ding ngaitua hiding, school ah teacher taksapna tawh kisai ah Manipur in 2012 kum ah teacher ding a lak khel ah teacher lakbe kit hinailo in a gen hi. Government nuai ah thiam zilna a hawizawk semna ding ah fund 25-30% tiang bek kimangthei leh nasatak ah masawnna um ding in a gen hi.
