ZÂLMANG LÊN-NA HIN SUILUNG A LÊNG NGEI MAI
– *K L Muana Khaute*
Tuzan maimit sing theilo a ka um lai in, lungdawi chia masate tawh vântham hawm mai ah, hinkhua leh khawvel nawpchen a lenlaini-te sût khawm in kalîm mamau hi. Ahin, amau chu thagau mi ahitak ziak un, I ngaidan leh lîmdan a kibat theilo ziak in, hinkhua matkhawm dan a kibang puan, vângam ngaina a lian mama hi. Ahinla, Pathian a hinna neilote khawsak dan a kimu in, khawvel ah hung kit-in, Lalpa na seppat thak kit chu a thangai mama ui.
Khawvel damsung a Lalpa dawigual a fam a la changte chu chukna ding ngak in, Lalpa’n mithiangtho-te ahun lakkhawm hun ding he mamau leule, kisikna hun neilo in, khawvel leh vân kikal in liangvai tak in a um un, lungsiat a um ngei mai ui.
Khrista thupiak zawm a zuitute leh a dawigual sem a hinkhua ala mang ah, khawvel thina ala changte chu Lalpa chawihawi in limtak in hinkhua a mang ui. Mithiangtho-te lakkhawm ni ding ngaklel in kipak leh lîmtak in zia nilopi chu ngak in, a lim mama ui. Chawihawi hitiu Lalpa belamno chu ti’n Pathian a pakchim thei puau.
Zia mithiangtho-te tawh kipawl khawmna hun kamang khawm ua, nang leh kei kitina him a um ta puan, Belamno thu leh Pathian chawihawina lâsak mailo chu bawl ding a nei ta puau hi. Amau ngei inle tawtawrawt vân Angel-te mut hun a mithiangtho-te Pathian kiang a lîmtawp umlo a hinkhua dan, mat ding chu a ngak la mamau a, amau kiang a chawmcha um mai inle zia gam tun hun ding chu ngakla a um ta ahi.
Leisiat a mi thite tawh zalmang a chawmcha kipawl khawmna mai ahinle, khawvel gam a I damsung chawmcha sung ahin, Lalpa na sep ding tampi ei musak hi. Ziate chu semthei ding in Lalpa’n damna, pilna, hausakna leh thagau umpina hi chang chiat ding ah hing leh dam a um nalai zosia Lalpa’n ei malzawl hen.
Khawvel ah, mite zalmang gam ala changte a kimu in, aw! ngaina mama in, khawvel gam ah hung kile kit dinga I chial chun, zia khawvel gam hi a ngai him him ta puau hi. Ei thu vaithak uh chu, Pathian thupiak gual a hinkhua mat a ginglotu te’n a ginchak theina ding un, nasem ding in ei vaithak ban un, Lalpa ni hi hungtung di ahitai, ki sazosa’n um un, tihi a thu tawp uh ahi mai hi. Awle, ei hing leh dam a um te’n Lalpa sepbak sem in, a huang a puilut ding in, Pathian dawigual in kisu thiangtho leh ama na bep sem ding in ei dawi ahi.
