Nisin Thuhiltu leh YVA General Headquarters, Presidential Candidate holimna
April 2, 2022 leh Young Vaiphei Association (YVA) GHQs Presidential Election 2022 umna ding ah Presidential candidate ding ah nomination file mi 4 te’n scrutiny a zaw tak dungzui un, Nisin Thuhiltu in candidate-te holimna a kineipi a, zia chu a nuai ah gual ahi.
Candidate min : D. Liana
Pa min: (L) Thangtinthong
Address: Hmuia Veng, Churachandpur
NT : Nisin Thuhiltu
DL : D. Liana
NT: Chawmkim tak in nang leh nang la hung kigen chian thei diam?
DL: Kei kahi le, D. Liana ka hi. Hmuia Veng, CCpur in ka um a, ka umna hi YVA New Lamka huapsung ahia, hun sawttak YVA New Lamka val-upa kala hito a, zia ban achun tuhi’n YVA New Lamka Unit ah Vice President, YVA New Lamka Block ah term beipen a khah Secretary in ka lapang a, tu hi Arts and Culture, Secretary in ka pang hi. Thiamzilna lam ah Master of Biblical Studies tiang ka lazo hi.
NT: Bang ziak ah YVA GHQs President hiding lunglut la hi em?
DL: I nam hi, khawvel chankang dungzui ah tu sang ah changkang zaw henla, tawmngaina lam hile tusang ahi’n liangvaite gualpha hina kawng ahin bangti leh a kipuihat zawthei dia aw..I nam hi bangti leh a changkang zawthei diam ti ah pan hattak ah ka lak ut ziak ah YVA GHQs President hi’na ala lunglut ka hi.
NT: YVA GHQs President role hi nang mimal mudan leh ngaidan ah banggual ahi em?
DL: Kei mimal ngaidan ah YVA GHQ President role ding ah poimaw ka sak chu, a masapen in titakna ahi. Mani mimal ngaidan ah chialo in, issue khat a umtak leh cabinet member-te dawng in, a poimaw ahileh Block, Unit te thuhiat in, YVA mi leh sa, dawtthei theite thudawt ah nei in, YVA liangvaite gualpha Block-te, Unit-te toh kithutuak tak ah panlak ahitheina ding ah role ki-play leh zia chu hawi ding in ka gel hi.
NT: YVA GHQs President khat in kituptak ah nasep thilbawlna a neitheina ding in bang poimaw pen in la gel em?
DL: YVA GHQs President khat in kituptak ah naseptheina ding ah poimaw ka sak penpen chu titakna, YVA hi kochuam, Pathian biakna tawle chiakhawm in ka hia, Pathian hiazing kawm in na kisem henla hileh ti chu a poimaw in ka gel hi. Chun, President rule gual ah mani ngaidan ah chia tawp kha hawi ka sapua, kithudawttua dialdial ah chia hileh maban hat ding in ka gingcha’i. YVA ahin muna ding, nek ding a umpua, senna ding, tha leh zung senna ding ahia, ziana achun, titak zet in I nam khantona ding ah panlak poimaw in ka gel hi.
NT: YVA GHQs kivaipuakna pha la sakpen leh pha la saklo siamphat ding ah la dawi pakhat gel la hung gen thei diam?
DL: YVA GHQs kivaipuakna pha ka sakpen chu thi-leh-manna chung ah nasepna, kangmei patau, kial-leh-tam chung ah nasep dante pha kasa’i. Pha kasaklo chu Dan leh Dun hih tu hun chiasate ka et leh maintain zo ka sapua, Dan leh Dun kituptak in kisiam henlang, kumpuan haw bang kibawl henlang, tia chun kichia leh pha ding in ka gel hi.
NT: YVA GHQs in a chiapi ding ah la dawi, promote la bawl nuam bang a um em? Promote bawl ding hile chun, banggual in la seppite promote la bawlpi diam?
DL: YVA GHQs in a chiapi ding ah pha kasak chu Dan leh Dun mumal tak kinei henla, YVA Headquarters, Block leh Unit in kituptak in chiapi henlang, tekhinna’n dan ah ka gen taksa gual ah kum puan haw bang kinei henla, for example, tukum ah kumpuan chu thiantho lam ahileh YVA umna zosia ah ni khat observe ah cleanliness drive bawlna umsak ding tite ahi. Ka dawi mama khat chu, blood donation lam hi kipibawl leh ti ka dawi a, zia promote bawlna ding achun, Block leh Unit-te haw leh mipite lak ah blood donation poimaw dan campaign bawl mun ding, zia campaign bawlna hi YVA Joint HQ Imphal toh kithua ah panlak hileh lawting thei ding in ka gel hi.
NT: La seppite banggual in la tilkho in, la suthatho zing diam?
DL: YVA hi liangvaite gualpha nasep ahia, a lawnei ah sep ding a umpua, voluntary na ahia, mani kipiakzawna ahi. “Khangsawnte ettontak ding ah thanuam leh gin-um tak ah pan I lak uh a poimaw hi” ti hi genpi zing kawm ah tawmngaina lam ah mi sang ah banggual in um leuhin I chungnung zaw diam uh tite hi genpi tam poimaw in ka hia’i.
NT: La seppite active lo mama ahiloleh poor performance nei umta leh bang la law diam?
DL: Ziate hichu puitu hi’na dawl ah gai chi in ka hepua, bang ziak ah active lo ahiu em ti hiatpi a ngai a, amau ut lam hiatpi kawm ah example a pan ah sukthathaw poimaw in ka gel hi.
NT: Mipi hotu/puitu hina dawl ah masang ah la experience haksa la sakpen bang ahi em?
DL: Mipi hotu/puitu hina dawl ah haksa mama ah ka hiat chu, lungthim pitin zaw hi a haksa mama hi. Ahinla zia hi puitu hi’na dawl ah a hiding him khat in a ka ngai a, na khat I sep chu mi khenkhat in ei pakchat zing lai ua khenkhat in demna ah ei nei, zia puakzaw chu haksa penpen in ka hia’i. Ahinla, zia chu puitu khat hina dawl ah ki-adapt thei a ngai hi.
NT: President hile chun nang term sung ah la sepdaw teitei ding thil pakhat la hung gen thei diam?
DL: YVA ti hi bangtik lai ale non-political body ala hia, ahin I Dan ukha amendment a kibawl a, “YVA hi politics ah ki-involve lo, ahinla nampi phatna ding ahileh…” tikha sukphat teitei ding ka ut a, assembly ko teitei ding, Dan kitup tak neitheina ding ah Danbu etthak hiding ahi.
