NAM PHATSAN KITITE HI BANG GUAL MITE A HI DIAM UH
By- KL Muana Vaiphei
Khawvel ah Pathian thilsiam zosia hi pawl chuamchuam ahi dungzui in nam leh gam a siam gaw chiat un, a siam zo le a um ah, a siam laitak le a um zinglai in a siam di kisa le nisin in ahung um zel hi. Khantona hawi ahizing kawm in, buaina lam tawh mekbel in kisiatna leh kikhenna tuntu mai gual in a um hi. Ahinla, a phatna leh a phatlona te zia thu ahin genseng lo di I hiu. Thu neucha’n vak gen katin, Vaiphei pasal in namdang zi a hem a hun nei a, mi khua leh tui ah chawmkhat a chen pat uh leh, a chenna te’u khua leh tui a akisuak bep uh hilo in, mi nam hina vakikawppi ban ah zi te pau a zui ziang mi Vaiphei lak ah a tam mama ziak in I nam population mawngmawng le a tam thei puai. Chuleh, thasiatna hau thei mama te aki hiziak in, thisan ah kingainatna le ahung tawm ah, insung kipumkhatna a gamla, I khantona’u chu midang te khantona ahi’n, nam a ding in khanmawbawk gual in kamu ahi.
Mi khua leh tui ah I chen chun mi pau, chawn leh khan, khawtang leh sakhua chiadan leh hindan, zuidan kibang lo tamtak te ziak in unau kilungsiatna a tawm tamai ahi. Sum leh pai hawlna, thiamzilna leh kivaihawmna ahung chuam tak ziak in mimal khantona va um maleh insung kingainatna tasam nuam deu a bang deu lo ahem kati nuam ahi. Sanga’n a tam a thipi sek a, mihiam in vang I dampi ban in khantona tamtak in a zangvuk nuam sek hi. Zia chu hezing kawm in lungthim vision nei tak in a bum ah chengkhawm guachiat in, thasiatna luanthi neucha um te kisikpeipi lo in, lungthim liantak pasal zawna tawh lunggel thak nei hun hivang lo a tam ti nawp um tuntun ahitai. Delaila mi melhawinu kam in Samson hatna thuguk a lakpiak lawmlawm gual ah kitekhin sang in, lunghei thak chiat leu hin I dinna’u apat I nam a ding ah malsawmna hithei zing nalai ahi.
Zia a chung ah thute ngaituana apat ka mu dan in, I vangkhua tampi um nazenpi zalen leh changtat nawp ziak ah, phaigam leh mi veng ah I hatna zosia va chenpi hin nampi maban politics kinepna daltu kihikha zaw ding ahi. Mihiam khat I hi chun nampi khankhua di ngaituana leh mailam khangthak te di gelna’n kalsuan chiat leu hin khatvei tei chu siamtu’n I khankhua diu hun guanggal ngei ding ahi. Zia ding achun, Lalpa’n I khankhua diu ei tua theina lampi ding hawnsaktu ah vak pan ah I nampi maban ding a pawimaw hi tithei chiat leu hin Ama hung kipan mai ding ahi.
