LEMNA LAL HUNG PIANG TA LEH LAMKA VANGKHAWPI A HIN
✍️K L Muana Vaiphei
Khawvel leh a sung ah hing vawnchawi zosia’n I la ngak la pen uh chu ‘Lemna Lal’ hung piang di chu ahi ngei mai a, siamtu lungtup, zawlnei thiangtho te kam a pat kum tam tak a pat a la puan lawk uh chu khawvel ah khawneu cha Nazareth ahiloleh Bethlehem mihiam te ngai ah kilawmlo tak mun a chun, 3 BC/AD vel in a hung piang ta mai chu khawvel Leng leh Lal te leh mipi tamtak te chu a buai ui. Ahinla, van Angel te leh khawvel mihing te chun kipak in a lawm maleu khawvel mihiam te chu a buai na’n a lungzing tau a hi.
Zia gual khawvel a hin mihiam leh mihing chengkhawm I hiziak un I chenna gam hi thim leh vak um khawm I hiziak un buai lo thei lo chu I hiu. Himaleh, buaina leh tuifawn a san po leh gingtute (mihing) te chu I ginnau ziak in I kilap san deu deu diu ahi. Butak leh bulem hui (thigua/ wind) in a khen dan sek gual in a tak leh a lem khenna chu hung um ngei di ahi.
Lamka khawpi hi Zosuan te a ding ah khaw thiangtho, neucha himaleh Zosuan te a bum ah I chenkhawpnau munpi leh lailung pen a hiziak a himai diam Khrist chanchinpha 1907/10 vel a pat Welsh Missionary te’n Pathian thagau puina zal in zokhawpi Aizawl via Vervek… Senvon patsan south Teimei..south Zogam Pupa gau ho, ho leh biak kichian nei lo te Khrista ah ginna leh hinna chu a hung musak ta’n I kipak a, taksa leh thagau lam a mitvakna I hung nei tau a hi.
Khrista chanchinpha ziak in ei sung bep hilo in gamdang leh nam dang te salvaktu leh Khrista chanchinpha puangtu leh hinpi tute I hung hi tau a, Pathian nam a nei leh hinpi tute I hung hi tau. Zia ziak tak ah chun ei uh a ding bep a hing leh dam I hita puau a, nam dang te leh Pathian a ding ah hing I hi tau ti hi hetmil lo pha di’n ka ngaitua a hi. Achutilo chun, eimau ah um Pathian mitnaucha,- thagau meivak hi Pathian in ei lak piak khaleh lungzin um ma ma di ahi.
Lalpa zal ah I chungnu’n nau Pathian nei I hinau hi khawvel hiat thei in Lamka khawpi hi thiamna, education, development, leh lampi chuam chuam ah mi hiat I hiu. Ahinla, gitlona a sang gualma’n Thagau mi, thagau lam dinmun inle a sang ma mai. Zia tak a chun bang gual haksatna hung tung sek maleh a mau zal ahin I gam leh nam hi a hung dam kit sek a hi. Zia dinmun Lul tak neitu I hina ziak ua hin Zogam, chankhat I chawlmun Manipur leh India gam hi le ei mau lak a um thagau mi khenkhat ziak in Pathian lopina leh chungnung pen ahi na puang zaktu hung hi tei ding in Lalpa thagau thiangtho chun hung hi hal thak kit ta hen ti hi ka pauchapna leh kinepna ahi… Hallelujah.
