DAWTNA PHAWT DAWNHU DI’N KA TIN PUAI:
By: K. L. Muana Khaute
Mihiam khat hi’na dawl in dawtna taphawt chu dawnhuna chu piak thei ahi. Ahi’nla, mi dawtna chu a dawng kha na’m ti leh, ka dawnna chu keima ngei in le dik ka sak lo le a um thei nalai hi.
Ziagual ah mi dawtna dik I dawnhu ahileh chu, i lungthim le kipak intin, amabo, kithepthakna mai ah midang te ei dawtna dawnhu kit mai chu, ei ma leh ei ma tuisa kibutkhum gual mai ahi. Thudik lo i gen te khan thiam lo ei chansak a, kipakna him a kinei thei pua’n, zia chu gitlona chikhat, ga hawilo tak suatu a hung hi sek hi.
Hiatna bukim lo leh diklo ka gen te hi, kei di’n melma lian a hung hi ta’n, kei leh kei le ka kingaidam thei pua’n, ka ngaituana a buai bep hi lo in ka hinna tiang a di’n lungzinna leh beidawnna, ka hinkhua tiang ah lungzînna leh kiningtelna mai a hung hitâk ziak in, khawvel ah hinnawpna him ka nei ta pua’n, ka kingaise tamai hi. Panpitu leh Nemtu ding ka hawl a, maleh ka muzo tapua’n, a tawp a tawp in Lalpa, ei siamtu chu ka ko lo thei tapuai.
Ka mihiam chanpi te’n ei taksan lo nung un, “Chungkhuanu chun a cha gual in ei pawm nalai dia aw” ti ah kingaitawmna him nei thei diak lo in, “Lalpa, kei hi mi lepchia leh mi chapo ka hi” ka tia, himaleh, kisikna tak tak neilo ka hi ahun hiatchian hi ding a hia, ngaidamna aw chu hiat malak sang in vauna huaise tak ka dawng tamai hi. Mailam leh nunglam hinkhua apat suanlam ding bangma heta lo in, thase ngawi ngawi in ka kap tai; ziaphet ah chun, aw khat a hung a, “la gitlona leh la lululna la kihetam” a hung ti tai.
La mihiam chanpi kiangah zuau gen leh ginum lo la hi chun, Lalpa la Pathian kiangah chun buk in la um a, x-ray kila gual in la gitlona zosia nusia ah ngaidam la dawt tak ziak in “ka hun ngaidam tai; tuni apat la hinna hi nang â dingah hing la hi ta pua’n, midangte leh Lalpa â dingah hing leh sem ding la hi’tak ziak in mivangpha la hi”.
Kua ka hem? bang ding ah khawvel ah ka len sung hinkhua mang ding ka hem ti ki helo ah hinkhua mat hi, a haksa’n a beidawn um sek hi. Tuhin chu, ka mihing chanpite muingilna ding leh, Lalpa ei siampa nasem di’n ka hinkhua um nalai sia hi mang tang ka ti’n sia ka sam tai. Lalpa ei pui tung in, Kumtuang gam nuam chu.
Ka hilona zosia leh ka kam leh Lei bawlaw tak mai hi, mitam tak suksiatna leh, ei mudatute kiang ah ngaidam ka dawt ziak ah a ngaidam na’u ka chan nung ah chun, ka hin a nuam a, khawvel hawina leh lopina ka muchian zaw diak in, ziagual siamtu thupi dan leh a kumtuang lemguat ka mu chet tak ziak in, nisin phatsin ah Lalpa chu ka chawi hawi zing tai.
Kuanle Pathian a muchian ah, a thilsiam te leh a kumtuang lemguat te a muchian nungah kipak lo chu a um thei puai. “Kipak in, Lalpa ah chun kipak in” tikhel chu gen ding dang aum ta lo hial mai hi. Amen!
