Site icon

THILPHA BAWL Bible chĂąngtel: Galatia 6:9,10 Aziktu: Pu Ginlalthuam

Kanam Vaiphei

THILPHA BAWL👌

Bible chĂąngtel: Galatia 6:9,10

Aziktu: Pu Ginlalthuam
‘Lalgin Inn’
Mualngat Innpi
Khualzinna Gam
( Land of pilgrimage)
đŸ’Ș

Simtute la leng un damna chibai uhle
.!

Lalpa Pathian in mihiamte hih thilpha bawl ding leh napha sĂȘm ding ah ei siam ihiu in, I sepna mun chiat un mani lawkna ding mai hilou in midang te kithuapi ding ah ei siam I hiu hi.Tichun, mihiamte hin nĂą sepna I nei chiat ua. Zia nĂą chuh alian leh aneu in a kikhen ah. Eima mani nasĂȘm chuleh government nasĂȘm/ thilbawl i hiu hi.

Britishte khang in sawlkar nasĂȘmte hih ‘Master’ ala tiu ah. Mipite hih ahiu le ‘Servant’ ala tiu hi. Himaleh, kum 1947 apat ei India gam in zalĂȘnna ihung mu’ in zia chuh ahung kitheng tuata. Government nasĂȘmte ahiu leh servant ahung kitia, a mipite hih master ahung kitita ahi.

Zia gual ah kithen tuana hih kum 72 lam hial ala liam tamaleh, ei India gam ahin zuithei tak tak lo I bang ua. Government nasĂȘmte master hizing in a mipite servant gual in India dĂąn Britishte khang apat ila chiapiu hih, tu’ khangtiang in atawp thei ta puai.
Zia ziak achun, government nasĂȘm khenkhat ‘servant’ ahi lam lam uh kihelo in, alet leh lal nau mun ah mipi dĂąn-leh-mual hia um talo; office ah zuchiate simmaw tak ah ui-ho-ak-ho ah kiho chĂąng bang mipite’n I tuak sek uh ahi! Kilet sakna ziak in India dĂąn pal kĂȘk hilo ihiu em? Mipi’n thu nei talo, sĂȘmtute zawkin thu anei tĂąk ziak un, nĂȘkgĂ»k-chĂąkgĂ»k apunglo theilo ahi ta ahi. Zia-nalai tak hih India dĂąnpi’ I zuikhial nau chuh ahung hitai.

Government nasĂȘmte leh mipite hih a kua zawk hih thunei zawding ihiu em ? Pu M K Gandhi in tihin ala gĂȘn hi, “Government jobs are meant for serving the people”-Government nĂą zosia hih mipite nĂą sep piak nading ah kisiam ahi( Meitei te’n “Seba touba”atiu hi ahi). Chuleh, Pu HT.Sangliana, IPS in tihin a gĂȘn hi, “Police officer khat ah pan hih mipite kithuapina dingah service pha tak ahi”.
Pu HT.Sangliana,IPS gual hih ilak in tam leu hin chuh, I gam leh nam hih khangto mai lo ding ahem?

Ahi’n, India mipite I vĂąngsiat nau khat chuh, tulai ah athiam-aching, alian-alal, sawlkar nasĂȘm khenkhatte hin mipite nasĂȘm ah pan nĂąk sĂąng in, thilpha bawl ding lung ah le gĂȘlpha ngai sek loin; mani go thil ding bep ngaitua na’n, mipite chan ding tiang tiang bang hei kawi in, “zawng thawk ding, ngĂąu in thuak”, ti’ gual deu dĂąn in, eima let leh lalna kualsung ah thilpha bawl ding he ma ma ngĂąl ah bawlthei sek lote ziak ahin, mipite liangvaina atut bĂąn in I gam in khantona abasam sek ahi.

Office ah mipite thil ngaitua ah zuchia khawm sekte chu I gĂȘn tĂąngpiu in ‘a mawl’ deu leh ‘a ching’ deu aki um kit hi. A mawl deute (office chia dĂąn helo leh a tĂąngpi sum nei zolo deute) chuh mu’sit ah um in, a ching deute (sum gawlgukna bawl zote) chuh ngaisak bikna lunggĂȘl inei sek uh hih, India dĂąn nuai ah sĂȘmtu dingin I tit nadiam? Mi zosia chung ah thilpha bawl ki um talo; ginna’ I innkuan pite chung tiang ahle bawl diak talote I hiu. Spirit of public service has been missing from the public servants- Mipi nasepna (public service) thagau hih mipi nasĂȘmtute( public servants) lak apat in a bei zotai.

Lalpa Pathian I honau leh I nasep dĂąn teu chuleh I lunggĂȘl teu hih Pathian biak inn gual in I mang talo uh abang ta e! Ziak achun, ei uh Kristian chapa leh chanute bĂȘk bĂȘk cha’ hin I nasepna mun chiat un thilpha bawl chimchĂąk puai tiu. Thilpha bawl ah I ha’pan zing ua le ahun takin a gĂą luak ngĂȘi ding ihiu.

Chutichun, hun lemchñng I nei zosiau hih mi zosia chung ah THILPHA BAWL na’n mat guachiat hitiu.
👍🙏👍

Exit mobile version