PATHIAN THU THIANGTHO NGUN TAKIN VAK NGAITUA KHAWM HITIU AW

Kanam Vaiphei

GL Muana Neitham, MA.MDiv. Th.D(Research scholar)

ZINGKALPHA GOODMORNING UNAUTE ALIAN-ANEU Atek-akhangte zosia LALPA JESU MIN IN DAMNA CHIBAI đŸ€

PATHIAN THU THIANGTHO NGUN TAKIN VAK NGAITUA KHAWM HITIU AW

FULLBODY CHECKUP 2025@2999
FULLBODY CHECKUP 2025@2999

By:GL Muana Neitham, MA.MDiv. Th.D(Research scholar)

HEBRAITE 11:24-27
[24] Ginna’n Mosi chu a pitin phatin, Pharaoh chanu’ chapa hi’ding a nuam pua’n; [25] sawt lo sung bep gitlo nopchĂȘn limpi sĂąng in, Pathian mite tawh sukgentheina thok chu a tĂȘl zaw tai. [26] Khrista a musitnau chu Aigupta ah gote sĂąng in hausakna thupi zaw’n a ngai ah, kipakman mu ding chu a thĂźl ziakin. [27] Ginna’n lengpa lungnatna chu lau lo in, Aigupta chu a taisan ah, mutheilo Pathian chu a mu ziakin a thuak ham ham hi

KHRISTIAN, Jesu Khrista gingtute chun Pathian ah ginna ziak un khawvel nawpsakna hun chomcha dai ding te sangin Pathian thumatna kumtuang daita ding chu a tĂȘl zaw zing tau hi.

Mosi’ ngei khanle maw, Pathian ginglo Aigupta leng inn tual sung ah bangkim nuamsa takah hinkhua mat liam sangin Pathian mite, a chipi Isreal te tawh gentheina thuak atĂȘl zaw ahi.

Khawvel lei nawpsakna hunchom cha dai ding tawh Kumtuang dai tading Pathian thumatna tawh tĂȘdan umlo ahiziakin tĂȘldan thiam ding in Pathian panpina dawn zing hitiu. Khawi zawk tĂȘl ding i hiu hem?
Gitlona a hi ti hetnak sa sa i bawl tei tei, i nek I dawn tei tei te, i khawi ah, i et tei tei te kha hun chom cha sung a ding in vang nawpsa a maithei i hiu hi. Hinla kisik ni um tei tei ding ahi. Gitlo kisik ngamna hi hukdam chate hi kilatna a hi. Nisin-hunsin gitlo kisik leh sim dingte chu Khristiante a hiu hi.

Khristian hinkhua hi kawng bangkim ah Pathian biakna hinkhua a hi ti hetmillo ding a hi. Biakin sung leh Kochuamte program um sung khu Khristian hi kilatna a hipuan, biakin pawlam i hung pawt apat khun Khristian hinkhua diktak chu kipan ham a hi zawi! Jesu Khrista Kochuamte(Khristian) chu Pathian a ding ah Thiampute a hi vek tau hi. Pathian a ding ah suak ginum (faithful servant) a hiu hi. Bukim hilo in Khrista ah chun a thiangtho Pathian nai zing in, thiangthona lam (Holiness) ah masawn zel sek hi. Gitlo sualna lungmuang i hi khak chun i hukdamna kivĂȘl thak ngai ding a hi. Pathian dawigual ah danglamna(changes) i neilo chun ei ah suk thiangthona (sanctifying) umlo tina a hi. Thagau ah Piangthaklo hinla sakhuana Khristian nunchan thaw thiamte chung a gĂźk hi, bang ziak in em i tichun mihiamte them a hi puau in Pathian them gua a hiziak un(Titus 1:16)

Thuthung lui hun lai ah Israelte a ding ah Pathian tawh a kikal ua Thiampu nasem Aron leh Levi suante (Aaronic and Levitical priesthood) hun hitalo in Pathian ma ei genpiak ding(mediator) Jesu a um a, genpiak tu midang ngaichuam bik talo in Direct in PATHIAN kiang in Jesu min in i Pauchap thei tau a hi! I haksatna teu leh i buainateu zosia Pathian kiangin tun leuhin, Aman ama phasak gual takin i khankhua dingu ei ngaitua piak ding a hi. Gilo-sual i hi’u kihedawk in,kisikna dik tawh Lalpa lam pan hitiu.(Acts 3:19, 1 John 1:9 Joel 2:13)

Sappau a fleeting pleasures fleeting pleasures of sin ti umzia i smartphone ua khan vak en tiam un.
Hunsawt dailo, hun chawmcha sung bep dai ding a i hinkhuau nawpchen tak ah gitlona i bawl zingu chun KISIK NI Hun hung tung pai ding a hin zia hun tak chuleh vang KISIKNA in umzia nei talo ding a hi e
hun hi kikhĂȘl thei ahi! Tiphut thei vek i hiu hi. Eite a ding ah hukdamna kawt khak kihawng zinglo ding a hi. A kikhĂȘl hun tung thei i hiu
.

Samuel bung 2 chang 12 apat 36 tawh Samuel 1na ma bung 3 chang 10 apat 14 chan vak sim leuhin. Pathian thupiak hetnak sa sa Thiampu Eli chapa panite gitlona i mu ui. Gitlona doding Khristian ten gitlona a nawpchen(enjoying sin) tak ua le Pathian lungnatna lau umtak maitua ngei ngei ding a hiu hi. Dawtna khat aw; La taksa nawpna, nang taksa dawidan banggual tuk in la do kha ta em? Do ding leh do nachang le helo ah Khristian hinkhua mangto i hi zaw mai diam? How do you resist/fight against the desires of your flesh?

Khristian hinkhua hi khawksak neilo ah nawp dan dan ah hinkhua matna tawh kituaklo a hi. Bangkim hi suangtua detÂČ leh ngaitua detÂČ ah (critical thinking),Bible zilsakna tawh kituak eina em tia hinkhua mang ding chu Khristiante i hiu hi. Tulai chiadan tawh kituak a khawsa dingte I hi puau in Pathian thu Bible zilsakna tawh kituak a khawsa hing dingte chu Khristiante i hiu hi. Pathian panpina dawn zing hitiu aw.

Pathian hepina aw nem in Lungsiat takin ei ko zing a hi. Gitlo kisik ah Lalpa lam bel ding in KO i hi zing ui
. Pathian in ei ko zing a hi. Nang a hung ko zing hi.
La i sak zing sek uh;

*Hun hi tui gual in a liam zing tikha phet dokin sa zel leuhin nawp a um ma ma hi. Ka la dawi ma ma khat le ahi


Unaute haw thu kigente(kizikte) haw hi ngaihak sa puai tiu aw

Kei a zik tupa hin ka zaw tñksa thute gen leh zik hilo kahi
Ken ading aj poimaw kasak leh mite ka dawisakna thupha kazik sek zawk a hi. Kei hile ahatlo pen pen te laka khatna kahi, a gilo pen pen ka hi. Gitlona do ve sam kahi(struggling Christian) Miten sim nawp asak ding uh leh alimpi ding uh thu chuam chuam le zik dan um nan ah hinla Bible, Pathian Thu hi mipite, mangthaite ding ah mawk lawp um ma ma hilo a hi ngal ah! Kimok thep lungmuang sak ah pawlam limna i buaipi lo ding uh a hi.

MATTHAI 11:28-30

[28] Nanghaw sĂȘmgim leh puakgik paw zosiate haw, ka kiang ah hung un, keima’n a la chawldam sak ing ka. [29] Ka ngawngkol hung puau in la, ka kiang in zil un: Lungthim ah nunnem leh kingaitawm ka hi; tichun, la thagau Ăą ding un chawldamna mu’n lau. [30] Ka ngawngkol a nuam in, ka puak le a jang hi, a tia

Bible sim utte ding in;

1John 3:4-9
1 Corinth 6:9-11
Hebrews 10:26
Rom 8:7
Galatians 5:16-18
James 4:17
1 peter 4:1-2

PA PATHIAN IN ATHU AMA LOPINA DINGIN EI MALZAWL PIAK CHIAT HEN AW JESU MIN IN AMEN🛐🛐

Exit mobile version