MISSIONARY DAY:KHRISTA AH I DINMUN UH KI ET THAK KIT POIMAW

MISSIONARY DAY:KHRISTA AH I DINMUN UH KI ET THAK KIT POIMAW

MISSIONARY DAY CHIBAI🤝

Bang a hi em Khrista ah i mission?
Bang ahem Pathian in nangah a mission chu?

*Mission leh calling umzia bang a hi diam?*

*Mission nasepna a poimaw pen bang ei diam?*

*Ei Nawp leh nawplo thu umlo ah khatvei vei missionary thawlawm tuak(piak) sek hi i mission chu a hi mai diam?*

*Bible ah Pathian in namthu(compulsory) ah thawlawm ziachu sum piak tei tei dingin ei phutlo a hi. Sum tuak ding dan(zat) le ei bithiak piaklo a hi. Pathian kipakna leh Ama dawilam chu ahileh Lunggil kipak leh kiphal tak ah PIAK (Cheerful giving) chu Pathian kipakna Bible ei zilsakna dik chu a hi*.(2Corinth 9:7 Mat 12:7). Pathian chanvo mawitak ah I gen sek te’u hawle, bible zilsakna diktak eina diam ti i zilchian zel ding uh a hi. *Khawvel kochuamte chagat khak ding i lau gual ua hin, Jesu Khrista Kochuam hilo khak ding zawk hi lau in, buaipi zaw leuhin phazaw ding a hi.* Zia chu Pathian kipakna hizaw ding a hi ngal ah! Kochuam kiti pawl chuam chuamte (denominational) khawvêl sum ah hausatna chuleh lian leh lal kichuna( ki têtna) zosia hi a bei kal ngakla a um takzet hi. Thiampu lêm, sakhuana leh Pathian min kilepna mang ah, khawvêl setan lalgam nasepna(working to extend personal empire) tawh Khrista Kochuamte etkawlna nasep kawp thiamte zosia hi Pathian hansia law a hiu hi!

*Lei Kochuam khantona ding ah mipite lak ah sum gen gen, sum dawl dawl mai leh Pathian nasepna a hi ti ah, mipite kiang ah sum piak ding kimawk phutkhum ti haw hi ki etthak kit a, siamphat ngaite siamphat zel ding a hi.* Sum dingmun hoi chu a pha a hi. Hinla ginglote, Khrista ah hinna neilote kiang ah sum dawl dawl, thawlom gen gen sangin, a kumtuang hinna ding uh zawk buaipi ding a hi. Kochuam ah ki register zosia hi Pathian chate a hi pua’u hi tihi gêldaw zing ding a hi. A hileh banggual ah Khrista Kochuamte’n pan la ding i hiu em? Ki Khristian sak, kochuam kineisak ahiloleh sakhuana tuitumte lak ahin missionary nasepna a pawimawna e maw?

Biakna leh Khristianna hi be leh phung thil ahiloleh nam thil ah chialo hial ding a hi. Kochuam khangto leh Kochuam Pathian kipakna têna chu sum(financial) dinmun a hi puai. *Pathian thu awina leh Pathian thutak gual ah hinkhua matna hi gingtue, Jesu Khrista Kochuamte ten i tup pen ding uh chu a hi!* Missionary day hi le nam thil leh pawl thil lamah thîl ding hilo a hi. Southern manipur lamah Gospel ahung lut pat dan ihiau a, kipak um le isa chiat ua, i lungdam chiat uh a hi.Missionary day ahung kipat dan chu i hetsau ahin kuate â bik deu ah gêllo ding a hi. Gospel hung pawlut masa, kuaten history nei masa tihaw ahin buai taloin, Khristian khat kahi chun Khristan’ kei ei kona(calling) leh mission mawpuakna ei piak(command) bang a hi em ti hi buaipi zaw chiat leuhin pha ma ma ding a hi. Pathian hepina ziak bep ah Khristian ihiu hi tihi gêldawk chiat ding a hi.

Sum sum paisa paisa, khantona khantona iti tiu haw hi le Bible zilsakna tawh aki tuak na em ti ki etthak kit zel sek dinguh a hi.

*Khrista Kochuam kiti hi Mipite sum bep a kingâ a hi diam?* Pawl chuam chuamte vang khawvel sum leh pai in kingâ nan au, hinla Khrista Kochuam diktakte vang chu a chuam a hiu e! La Kochuamna em? Jesu â ding ah mission chuam hita ding ah Khawvel ah pat Kochuam diktak lahina em?

*Kochuam kiti hi Sum a hausa ding leh mani huntawk kisa, ki dawikhawp ma ma dingte a hi diam uh?*

*Kochuam kingakna ding chu sum a hi diam?*

*Kochuam khat chu sum leh pai ah hausa huntawk leh ki todel zo ma ma ahichun Khrista kochuam tina a hi diam?*

*Lalpa Jesu Khrista’n aphu daw, Ama Kochuam dik takte kingakn’au, a thamuanna’u, a hausatnau leh a SECURITY uh kua a hi DIAM? JESU maw ahiloleh SUM ahiloleh Mihingte a hi mai diam le?*

Kochuam leh Mission nasepna ahin sum a pawimaw puai tina hilo in, bang hem a poimaw masapen tihi a hi zawi. Sum ahem, building lopitak tak te ahem ahiloleh JESU zawk?
Piangthaklo leh ginglotute akipat in sum donation tampi pi dawlkhawm in missionary nasepna bawl ding ahi diam? Pathian in ei thupiak Gospel chanchinpha hilna hi khawvel (piangthaklo te)mite mawpuakna a hi diam? Chanchinpha hil ding ah Jesu’n a thupiak te hawkha kuate ei diam? Piangthak diktak HUKDAM chate kiangah Lalpa JESU thupiak a hi zawi!

*Kuale hetna ding ah nakhang nei chun he tau hen*

*Khrista Kochuamte chu sum leh pai hawl a, biakinn â ding ahiloleh kochuam â ding ti ah KHUTDAW gual ah vak vel vel dingte a hi pua’u hi. A PETU neilo ihi zaw diam? A neitu kiang a dawn lo ihi zaw diam?* Khawvel thil(Worldly economy) leh Khrista chanchinpha leh Pathian nungzuina hi chiapi khial ki um thei a hi.

Khristian mitin tehi Pathian nungzuite ihiu hi. PATHIAN â ding ah Missionary vek ihiu hi. PATHIAN in ei kona leh ei thupiakte (commandments) hechian in NISIN-HUNSIN in JESU KHRISTA HIATPITU(Witness) muan um hithei zing ding in PAUCHAP in PATHIAN panpina dawn zing hitiu. Khawvel sakhuana dan leh dunte a hin ngawl huaitakin lungmuang in, tuitum in mangthai den ziang khanla aw Unau. Babulon zu dawnkham hinkhua mang ihi khak ding uh lauthawng um a hi!

*Tu’hin vang, Khrista Jesu ah chun, nanghaw malai ah gamla tak ah umte chu, Khrista thisan ah chun hi’nai in la hung um tau hi. Ama chu I kichamnau ahi’n, pawl nite chu pumkhat ah siam in, I kikâl ua daidanna bâng chu a suchim ta ahi. Pani hilai kha ama ah mihing thak pakhat hiding ah a siamdaw theina dingin, dan leh a thupiakte leh a thuthungte chu subei in, kichamna a bawl tai; kros jal ah panite chu kipumkhat ah, Pathian ah a kicham theina ding un, kituak lona zosia chu a that ta ahi. Chun, a hung ah, nanghaw gamla tak ah umte leh naicha umte kiang in le chamna chanchinpha a hung hil a. Ama ziak ah chun Thagau mun khat ah, Pa kiang ah luttheina I nei gêl tau hi. Ahi’n, tu’hin malzin leh gam chuam mi la hita puau a, mithiangthote tawh tual khat ah leng khawm, Pathian Inkuante la hitau hi; Khrista Jesu ngei chu a kil ah suang poimaw pen ahi’n, sawlchâkte leh jawlneite suangphûm chung ah sak la hiu hi. Ama ah chun suanglep chuam chuamte, kituak tak ah sutua in, Lalpa ah biak In thiangtho a hung suak tai. Nanghaw le ama ah chun, Thagau ah Pathian chênna mun ding ah lepkhawm la hitau hi*
EPHESA 2:13-22

Pathian Thagau Thiangtho apat la piangthak ni kha nang â ding in la KHRISTIAN NI a hi.
La Khristian ni kha MISSIONARY ni kipat NI a hi. Khristian zosia chu JESU â ding ah Missionary vek ihi’u hi.

MISSIONARY DAY LÎM LEH KIPAK TAKIN…..

Lalpa Pathian in simtute zosia ama Lalgam kekliantu leh Ama mission hechian ding in ei malzawl tahen aw Jesu Min in AMEN

GL Muana Neitham

*☦️KHRISTA LALPE’N SEPAITE ☦️*